Angelina Jolie viziton Pakistanin e goditur nga përmbytjet

Aktorja amerikane, Angelina Jolie, (veshur me të zeza) duke dëgjuar përmes një përkthyese gratë në lagjen Dadu të Pakistanit pasi ato u zhvendosën nga përmbytjet që kanë kapluar Pakistanin që nga mesi i qershorit.

Jolie është e dërguar speciale e OKB-së për refugjatët. Ajo kishte qenë edhe më parë në Pakistan si e dërguar speciale e OKB-së, pas tërmetit vdekjeprurës të vitit 2005 dhe pas përmbytjeve të vitit 2010.

Jolie mban një maskë në fytyrë teksa flet me një nënë që jeton në një strehë të improvizuar në lagjen jugore Dadu.

Komiteti Ndërkombëtar i Shpëtimit (IRC) tha në një deklaratë para vizitës së aktores, më 20 shtator, se Jolie do të ishte atje "për të dëshmuar dhe për të kuptuar situatën si dhe për të dëgjuar nga njerëzit e prekur drejtpërdrejt për nevojat e tyre dhe për hapat për të parandaluar vuajtje të tilla në të ardhmen".

Një djalë duke kaluar nëpër ujërat e përmbytjeve në distriktin Jaffarabad në Pakistanin qendror, më 19 shtator.

Sezoni i shirave monsune  të vitit 2022 ka sjellë sasi tri herë më shumë sesa mesatarja e reshjeve në Pakistan, duke shkaktuar përmbytjen e një pjese të madhe të vendit.

Njerëzit e zhvendosur brenda Pakistanit duke marrë ushqime pranë një kampi në provincën Sindh, të goditur nga përmbytjet, më 19 shtator.

Më shumë se 1.500 njerëz kanë humbur jetën si pasojë e përmbytjeve, duke përfshirë një numër në rritje të vdekjeve të shkaktuara nga sëmundjet.

Njerëzit në gomone të improvizuara janë bartur nëpër ujërat e përmbytjeve në distriktin Jaffarabad, më 18 shtator.

Organizata Botërore e Shëndetësisë thotë se sëmundjet në rritje si rezultat i përmbytjeve ka gjasa të shkaktojnë një "katastrofë të dytë".
 

Personat e zhvendosur brenda një kampi në provincën Sindh, më 19 shtator.

Më shumë se 300 njerëz kanë vdekur nga sëmundjet që nga 1 korriku dhe më shumë se 2.7 milionë janë trajtuar për sëmundje të shkaktuara nga uji në spitale të improvizuara dhe të lëvizshme, sipas agjencisë Reuters.

Një familje që iku nga përmbytjet dhe u vendos në një kodrinë, është fotografuar në një strehë të përkohshme në distriktin Jaffarabad, më 19 shtator.

Shkalla masive e përmbytjeve po e thellon krizën mjekësore pasi shumë spitale mbeten të zhytura në ujë dhe të papërdorshme. Pjesa më e madhe e tokës bujqësore të vendit për kultivimin e ushqimit është gjithashtu nën ujë.

Një turmë burrash të prekur nga përmbytjet duke pritur për të marrë ndihma në qytetin jugor të Larkana.

Zyrtarët pakistanezë thanë se do të duhen të paktën dy muaj që ujërat e përmbytjeve të tërhiqen plotësisht.