Lajmet

AI kërkon që OKB të adresojë abuzimet e kryera nga talibanët

Luftëtarët talibanë duke shpërndarë një protestë të organizuar nga gratë afgane në Kabul më 13 gusht 2022.

Organizata për të drejtat e njeriut, Amnesty International i ka bërë thirrje Këshillit për të Drejtat e Njeriut të OKB-së që të adresojë “abuzimet e pamëshirshme” nga Qeveria e udhëhequr nga talibanët në Afganistan.

Përmes një deklarate, Amnesty kërkoi nga Këshilli i Kombeve të Bashkuara që të “krijojë një mekanizëm të pavarur hetues në Afganistan sa më shpejt që të mundet, me fokus në ruajtjen e dëshmive me qëllim që të ndiqet drejtësia ndërkombëtare”.

Kjo organizatë përmendi “valë të arrestimeve” dhe “ndalime të paligjshme” të mbrojtësve të të drejtave të grave, akademikëve dhe aktivistëve.

Amnesty International po ashtu përmendi sulmet ndaj civilëve në rajonin Panjshir, ku rezistenca ushtarake ndaj talibanëve gjithmonë ka qenë e fortë, “përfshirë dhe rrëmbime dhe zhdukje me forcë” që “ende po kryhen teksa konflikti mes talibanëve dhe Frontit për Rezistencë Kombëtare po vazhdon”.

SHIKONI EDHE: Lufta e talibanëve kundër grave dhe vajzave afgane

Organizata tha se ka hulumtuar edhe vrasjet masive të hazarëve etnikë nga luftëtarët talibanë në provincat Gazni, Gor dhe Dajkundi dhe kryesit e këtyre veprave nuk janë përballur me drejtësi. Amnesty tha se ruajtja e të dhënave “është kyçe në ndjekjen e drejtësisë ndërkombëtare”.

Abuzimet e vazhdueshme dhe mohimi i të drejtave më bazike për gratë kanë vazhduar dhe janë rritur gjatë 18 muajve sa talibanët janë në pushtet.

Vetëm gjatë kësaj jave, zyrtarët ndërkombëtarë kanë shprehur zemërimin e tyre me refuzimin e talibanëve që të lejojnë gratë dhe vajzat të vijojnë mësimin në shkolla dhe universitete.

SHIKONI EDHE: BE: Talibanët nuk kanë dhënë zotim për rihapjen e shkollave për vajzat afgane

“Është koha që komuniteti ndërkombëtar të ndjekë deklaratat e tij të përsëritura publike me veprime konkrete”, tha sekretarja e Përgjithshme e Amnesty, Agnes Callamard.

“Komuniteti ndërkombëtar duhet të veprojë shpejt dhe të krijojë një mekanizëm për gjetjen dhe ruajtjen e provave dhe të sigurojë hetime të pavarura në mënyrë që të mund të ketë ndjekje penale”, shtoi ajo.

Këshilli për të Drejta të Njeriut i OKB-së, që ka selinë në Gjenevë, është organizata e vetme ndërqeveritare në botë për të drejtat e njeriut, por nuk ka fuqi detyruese ndaj shteteve anëtare të OKB-së.