Ambasadori amerikan në Kosovë, Jeff Hovenier, ka inkurajuar sërish të gjitha palët e përfshira në dialogun mes Kosovës dhe Serbisë – të ndërmjetësuar nga Bashkimi Evropian – të angazhohen në mënyrë konstruktive, fleksibile dhe urgjente që të arrihet përparim në këtë proces.
Sipas tij, integriteti dhe sovraniteti territorial i Kosovës nuk janë të diskutueshëm.
Ai i ka bërë këto deklarata pas takimeve që ka zhvilluar në Prishtinë me të dërguarin amerikan për Ballkanin Perëndimor, Gabriel Escobar, dhe të dërguarin e Bashkimit Evropian për dialogun Kosovë-Serbi, Mirosllav Lajçak.
Ecobar dhe Lajçak janë takuar edhe me krerët e lartë shtetërorë të Kosovës, përfaqësuesit e opozitës dhe shoqërisë civile gjatë vizitës së tyre treditëshe në Kosovë.
Të mërkurën, 2 shkurt, ata janë nisur drejt Beogradit.
SHIKONI EDHE: Escobar dhe Lajçak: Nuk do të imponojmë modele për AsociacioninDy diplomatët perëndimorë e kanë inkurajuar Kosovën që të vazhdojë dialogun për normalizimin e marrëdhënieve me Serbinë.
Ata po ashtu kanë thënë se të gjitha marrëveshjet e arritura deri më tash në Bruksel duhet të zbatohen.
Kosova dhe Serbia nuk kanë zhvilluar bisedime në nivel të lartë qysh në korrik të vitit të kaluar.
Çështja e formimit të Asociacionit të komunave me shumicë serbe shihet si shkak i bllokadës.
Formimi i këtij asociacioni është paraparë me një marrëveshje që Kosova dhe Serbia kanë arritur në vitin 2013.
Qeveria aktuale e Kosovës e udhëhequr nga kryeministri, Albin Kurti, ka thënë se në Kosovë nuk mund të ketë asociacion njëetnik.
Serbia, në anën tjetër, këmbëngul në krijim e tij.
SHIKONI EDHE: Asociacioni - marrëveshja që duhet zbatuar