Drejtorët politikë të vendeve anëtare të grupit të Kontaktit kanë takuar sot në zyrën amerikane në Prishtinë ekipin negociues të Kosovës, si dhe përfaqësues të pranisë ndërkombëtare në Kosovë. Procesi i përcaktimit të statusit të Kosovës do të përfundojë gjatë këtij viti, prandaj Grupi i Kontaktit ka premtuar se do ta përshpejtojë procesin, tha sot Hashim Thaçi anëtar i grupit negociues pas takimit me përfaqësuesit e Grupit të Kontaktit. Zoti Thaçi tha gjithashtu se ishte qëndrim i përbashkët, se pala kosovare në asnjë moment, nuk e ka bllokuar procesin e bisedimeve për decentralizimin. Grupi i Kontaktit edhe njëherë ka përsëritur se nuk do të ketë asnjë lloj ndarje të Kosovës, qoftë ajo de facto apo ndryshe. Ndërkohë, kryetarët e komunave të veriut u kanë deklaruar përfaqësueve të Grupit të Kontaktit se statusi i ardhshëm i Kosovës duhet të mundësojë një jetë normale për komunitetin serb në Kosovë dhe se nuk duhet nxituar në marrjen e vendimit për statusin e ardhshëm.
