"Ne po i çojmë marrëdhëniet mes Shqipërisë dhe BE-së në një nivel tjetër. Prioritetet e BE-së në këto marrëdhënie përfshijnë luftën kundër korrupsionit dhe krimit të organizuar, garantimin e së drejtës së pronësisë dhe lirisë së mediave", ka shkruar në letrën e tij drejtuar kryeministrit të Shqipërisë, Sali Berisha, kryetari i Komisionit Evropian, Jose Manuel Barroso. Më tej Barroso ka çmuar rolin e Shqipërisë në rajon dhe ka theksuar se së shpejti do diskutohet lehtësimi i vizave për vendet e Ballkanit Perëndimor.
