Irani ka filluar të prodhojë sasi të vogla uranium të metalit, tha kreu i Agjencisë Ndërkombëtare të Energjisë Atomike (IAEA), Rafael Grossi.
Kjo përbën edhe një shkelje të marrëveshjes bërthamore të Teheranit me fuqitë botërore të arritur në vitin 2015. Grossi u tha vendeve anëtare se inspektorët kanë gjetur 3.6 gram uranium të metalit në një impiant bërthamor në Isfahan të Iranit.
Edhe pse kjo është një sasi e vogël dhe nuk ka kaluar në procesin e pasurimit, metali i uraniumit mund të përdoret për të krijuar bazën e një arme bërthamore.
Në bazë të marrëveshjes bërthamore të arritur nga Irani, Shtetet e Bashkuara, Kina, Rusia, Gjermania, Franca dhe Britania e Madhe u vendos që Teherani të ndalë për 15 vjet prodhimin e një lënde të tillë.
Lexoni edhe këtë: Irani dhe Koreja e Veriut bashkëpunojnë në programin raketor, thotë raporti i OKB-sëIsh-presidenti, Donald Trump tërhoqi Shtetet e Bashkuara nga pakti bërthamor më 2018 dhe vendosi përsëri sanksione shkatërruese ndaj Teheranit. Si kundërpërgjigje, Teherani gradualisht filloi me shkeljen e marrëveshjes.
Në muajin janar Irani njoftoi se e ka në plan të zhvillonte hulumtime për prodhimin e uraniumit të metalit duke thënë se lënda është e nevojshme për një reaktor kërkimor në Teheran.
Menjëherë pas këtij njoftimi, Gjermania, Franca dhe Britania thanë se janë “shumë të shqetësuara”.
Shkelja e fundit e marrëveshjes nga ana e Iranit komplikon edhe më shumë mosmarrëveshjet mes Teheranit dhe Uashingtonit për të ardhmën e paktit bërthamor.
Administrata e presidentit amerikan, Joe Biden ka thënë se do të përpiqet të ngjallë diplomacinë karshi Iranit, por vetëm nëse paraprakisht Teherani i kthehet zbatimit të marrëveshjes.
Zyrtarët iranianë këmbëngulin që Shtetet e Bashkuara duhet së pari të heqin sanksionet.