Shkencëtarët rusë kanë thënë se vaksina e tyre kundër koronavirusit, Sputnik V, ofron rreth 91 për qind mbrojtje kundër sëmundjes COVID-19, që shkakton ky virus, bazuar në të dhënat e publikuara në revistën kërkimore The Lancet.
Rezultatet kanë të bëjnë me fazën e fundit të testimit të kësaj vaksine, në të cilën kanë marrë pjesë rreth 20,000 persona.
Vaksina ka rezultuar të jetë e sigurt dhe ka ofruar mbrojtje të plotë kundër hospitalizimit dhe vdekjes.
Dalja në treg e kësaj vaksine është përcjellë me polemika, meqë ka nisur të përdoret para se të publikoheshin të dhënat e fazës përfundimtare.
Mirëpo shkencëtarët besojnë se përftimi i saj është vërtetuar tani.
Ajo hyn në mesin e vaksinave të miratuara në shumë vende të botës nga kompanitë, Pfizer, AstraZeneca, Moderna dhe Janseen.
Vaksina Sputnik funksionon në mënyrë të ngjashme sikurse ajo e krijuar nga Universiteti Oksford dhe kompania AstraZenenca, e prodhuar në Mbretëri të Bashkuar dhe ajo e kompanisë Janssen, e krijuar në Belgjikë.
Përmes vaksinës injektohet një lloj i ftohtë virusi, që besohet se nuk shkakton dëm dhe bart një sasi tejet të vogël të koronavirusit në organizëm.
Injektimi i një doze të vogël virusi mëson organizimin për rrezikun që i kanoset dhe mëson ta luftojë atë më vonë.
Deri më tani nuk ka pasur reaksione serioze të lidhura me testimin e vaksinës.
Fondi rus i Investimeve Direkte, që ka ndihmuar në financimin e vaksinës Sputnik V, ka thënë muajin e kaluar që më shumë se 1 milion rusë janë vaksinuar me këtë vaksinë.
Mirëpo disa rusë kanë thënë se dyshojnë nëse kjo shifër është e vërtetë, meqë fushata e testimit ka qenë më e ngadalshme.
Autoritetet hungareze janë të parat në Bashkimin Evropian që kanë miratuar këtë vaksinë muajin e kaluar.
Megjithatë, Qendra Kombëtare për Shëndet Publik në këtë shtet duhet të japë miratimin përfundimtar para se të shpërndahen vaksinat në publik.