Ambasadorja amerikane në Shqipëri, Yuri Kim, tha se beson se më 31 dhjetor, Gjykata Kushtetuese e Shqipërisë do të jetë funksionale.
Kim tha se për këtë ka marrë fjalën edhe nga presidenti i Shqipërisë, Ilir Meta, dhe kryetari i Kuvendit, Gramoz Ruçi.
Në një intervistë për Zërin e Amerikës, ajo tha se korrupsioni në Shqipëri është një kancer dhe se është i tillë si në reputacion, ashtu dhe në realitet.
Për këtë arsye, shtoi Kim, është e rëndësishme që Prokuroria Speciale të funksionojë plotësisht.
Gjykata Kushtetuese e Shqipërisë, tash e dy vjet, nuk funksionon, pasi vetting-u ka nxjerrë jashtë sistemit shumicën e trupës së gjyqtarëve të saj, kryesisht për mosjustifikim të pasurisë.
Procesi për emërimin e trupës së re të gjyqtarëve kushtetues është ngrirë qysh në dhjetor të vitit të kaluar, kur presidenti Meta e ka bllokuar atë duke mos thirrur për t'u betuar një kandidate për anëtare të Gjykatës, të miratuar në Parlament dhe të mbështetur nga shumica socialiste.
Funksionimi i Gjykatës Kushtetuese është në mesin e kushteve që disa vende të Bashkimit Evropian ia kanë vënë Shqipërisë për të filluar negociatat e anëtarësimit në BE.
Intervistën e plotë të ambasadores Kim, dhënë Zërit të Amerikës, mund ta lexoni këtu.