Shtetet e Bashkuara janë të zhgënjyera me bllokadën që Bullgaria po i bën integrimit evropian të Maqedonisë së Veriut, tha ambasadorja e SHBA-së në Shkup, Kate Byrnes.
Në një intervistë për Televizionin Telma në Maqedoninë e Veriut, ajo tha se mosmarrëveshjet dypalëshe duhet të zgjidhen jashtë procesit të integrimit dhe vuri në dukje se Uashingtoni e kishte bërë shumë të qartë se dëshironte të shihte mbajtjen e një konference ndërqeveritare të BE-së me Maqedoninë e Veriut, deri në fund të këtij viti.
"Ne e shohim anëtarësimin e Maqedonisë së Veriut në BE si një interes të përbashkët", tha Byrnes.
SHIKONI EDHE: Karakaçanov: Maqedonasit duan mbështetje, por edhe të na godasin pas shpineBullgaria ka bllokuar nisjen e bisedimeve për anëtarësimin e Maqedonisë së Veriut në Bashkimin Evropian, pasi kërkon që Shkupi të pranojë se si identiteti, ashtu edhe gjuha e saj kanë rrënjë bullgare.
Presidenti maqedonas, Stevo Pendarovski ka thënë ditë më parë, në një intervistë për televizionin austriak ORF, se kërkesat bullgare janë “përtej mendjes së shëndoshë”.
Maqedonia e Veriut mbetet në qëndrimin se maqedonishtja është një gjuhë e veçantë sllavo-jugore që përbëhet nga pjesë të kulturës dhe identitetit kombëtar të vendit.
Zyrtarët maqedonas kanë thënë se për çështjet e identitetit nuk do të pranojnë asnjëherë të bisedojnë me Bullgarinë.
SHIKONI EDHE: Vetoja bullgare nxit urrejtje në Maqedoninë e Veriut