Lojërat Olimpike në Tokio do të mbahen vitin e ardhshëm “me apo pa COVID-19”, tha nënpresidenti i Komitetit Olimpik Ndërkombëtar, John Coates.
Ai konfirmoi për agjencinë e lajmeve AFP se Olimpiada do të nisë më 23 korrik, 2021.
Ajo ka qenë e paraparë të nisë në korrik të 2020-ës, por është shtyrë për shkak të pandemisë COVID-19, sëmundjes që e shkakton një koronavirus i ri.
Coates tha se tema e Lojërave fillimisht ka qenë: “Lojërat e rindërtimit pas shkatërrimit nga cunami”, duke iu referuar kështu një cunami shkatërrues që ka goditur Japoninë në vitin 2011.
Por, shtoi ai, tema e tyre tani do të jetë: “Lojërat që mposhtën COVID-in, drita në fund të tunelit”.
Në korrik, shefi ekzekutiv i Tokio 2020, Toshiro Muto, ka thënë se është e mundur që Lojërat të mbahen me një audiencë të "kufizuar", pasi ata duan ta shmangin mundësinë që të mos ketë fare spektatorë.
Ka qenë e planifikuar që më shumë se 11,000 atletë nga rreth 200 vende të botës të marrin pjesë në Lojërat 2020.
Nuk është ende e qartë se si mund të ndikojnë kufizimet e udhëtimit në pjesëmarrjen e tyre, pasi kufijtë e Japonisë aktualisht janë të mbyllur për vizitorët e huaj.