Arrestime masive në protestat në Bjellorusi

Policia në Bjellorusi arrestoi 633 persona në protestat e së dielës në këtë vend, njoftoi të hënën Ministria bjelloruse e Punëve të Brendshme.

Protestat kundër regjimit të Alexander Lukashenkës u mbajtën në Minsk dhe qytete të tjera, për të katërtën fundjavë me radhë.

Dhjetëra-mijëra njerëz e sfiduan praninë e madhe të forcave të sigurisë, për të kërkuar dorëheqjen e presidentit.

Lukashenka mban pushtetin bjellorus qysh në vitin 1994. Ai është rizgjedhur president muajin e kaluar, por, sipas opozitës, zgjedhjet janë manipuluar.

Protestuesit, aktivistët e të drejtave të njeriut dhe vëzhguesit thonë se policia po i shtyp brutalisht marshimet paqësore.

Dëshmitarët i thanë agjencisë ruse të lajmeve Interfax se arrestimet në Minsk kanë nisur pasi ka mbaruar tubimi dhe njerëzit kanë nisur të shpërndahen.

Disa pamje të shpërndara në internet kanë treguar njerëz të veshur me të zeza duke rrahur protestuesit me shkopinj.

Hrodna, Bjellorusi, 6 shtator, 2020.

Ministri i Punëve të Brendshme, Yuri Karayev, i mbrojti veprimet e forcave të sigurisë.

“Flasin për brutalitetin e policisë bjelloruse dhe unë dua ta them këtë: nuk ka asnjë polic më njerëzor, më të përmbajtur dhe me kokë më të ftohtë në asnjë vend të botës”, tha Karayev.

Një protestuese në Minsk, e cila u identifikua vetëm si Lyudmila, i tha BBC-së se demonstruesit nuk do të pengohen nga forcat e sigurisë.

“Ne përfundimisht nuk jemi gati të kthehemi në jetën që kemi pasur për shumë vite", tha ajo.

Shefi i politikës së jashtme të Bashkimit Evropian, Josep Borrell, përsëriti thirrjen e tij për "dialog kombëtar gjithëpërfshirës", duke thënë se "demonstratat masive në Bjellorusi tregojnë vendosmërinë e njerëzve për të arritur lirinë, të drejtat dhe demokracinë e tyre, përballë arrestimeve, kërcënimeve dhe dhunës".

SHIKONI EDHE: Tsikhanouskaya: Krimi i autoriteteve bjelloruse nuk do të fshihet nga kujtesa

Të premten, udhëheqësja e opozitës bjelloruse, Svetlana Tikhanovskaya, e cila është strehuar në Lituani, kërkoi nga Kombet e Bashkuara që të ndihmojnë në ndalimin e shtypjes së protestuesve nga autoritetet.

Tikhanovskaya, 37 vjeçe, përfaqësoi opozitën kryesore të Lukashenkës në zgjedhje. Ajo hyri në garën presidenciale pasi burri i saj, Sergei Tikhanovsky, dhe një kandidat tjetër u burgosën.

Tikhanovskaya tha se kërkon t'i jepet fund dhunës policore, të lirohen të gjithë të burgosurit politikë dhe të mbahen zgjedhje të lira dhe të ndershme.

Muajin e kaluar, udhëheqësit e BE-së kanë rënë dakord që të vendosin sanksione ndaj zyrtarëve bjellorusë, të përfshirë në manipulimet e pretenduara në zgjedhje, brutalitet dhe burgosje të protestuesve. Sanksionet e sakta janë ende duke u përpunuar.

Rrahjet, kërcënimet për përdhunim dhe kërkimi i të zhdukurve në Bjellorusi

Raportuesja e posaçme e Kombeve të Bashkuara për Bjellorusinë, Anais Marin, tha se rizgjedhja e Lukashenkës president është "manipuluar plotësisht" dhe se "votat e njerëzve janë vjedhur".

Marin e akuzoi policinë bjelloruse për “torturë”.

"Autoritetet duhet t’i lirojnë të gjithë të arrestuarit në mënyrë arbitrare. Qeveria po bën një luftë të çmendur kundër popullit të saj", tha ajo.

SHIKONI EDHE: Galeotti: Lukashenkan do ta rrëzojnë nga pushteti bashkëpunëtorët e tij

Lukashenka i ka mohuar të gjitha akuzat për manipulim të votave. Ai i ka fajësuar disa vende të Bashkimit Evropian, sidomos Poloninë dhe Lituaninë, për përpjekje për të detyruar ndryshimin e regjimit.

Ai është zotuar se do ta mbrojë Bjellorusinë.

Përgatiti: Valona Tela