Ekziston një “hapësirë e madhe globale” në mes të fondeve që duhen për luftim të koronavirusit, dhe fondeve që janë ndarë për këtë çështje, ka thënë shefi i Organizatës Botërore të Shëndetësisë, Tedros Adhanom Ghebreyesus.
Më shumë se 19.92 milionë persona është raportuar të jenë infektuar me koronavirus në gjithë botën, ndërkohë që 729,883 kanë vdekur, transmeton agjencia e lajmeve, Reuters.
Për të infektuar është raportuar në më shumë se 210 shtete e territore, derisa rastet e para janë identifikuar në Kinë, në dhjetor të vitit 2019.
“Tre muajt e ardhshëm paraqesin një dritare tejet të rëndësishme të mundësisë për të rritur ndikimin e Iniciativës ‘Mjetet për qasje ndaj COVID-19”, ka thënë Tedros në një konferencë për media në Gjenevë.
“Megjithatë, për ta shfrytëzuar këtë mundësi, neve na duhet t’i rrisim fondet për këtë Iniciativë dhe të kthejmë në prioritetet përdorimin e mjeteve të reja”.
Ai ka thënë se OKSH-ja ka vetëm “10 për qind të fondeve” në vlerë të miliarda dollarëve, sa është thënë se i nevojiten.
“Vetëm për vaksinë nevojiten më shumë se 100 miliardë dollarë. Kjo është shumë e madhe e të hollave dhe në fakt është”, ka deklaruar ai.
“Mirëpo është shumë e vogël në krahasim me 10 trilionë dollarë që investuar nga shtetet e G20-ës, si stimuj për t’u përballur me pasojat e pandemisë deri më tani”, ka shtuar ai, duke iu referuar grupit të 20 vendeve më të industrializuara.
Megjithatë ai ka thënë se ekziston shpresë në gjithë këtë situatë.
“Nuk është kurrë vonë për ta mposhtur pandeminë. Mesazhi është për ta “shtypur, shtypur, shtypur”, ka thënë ai.
Mjeku, Mike Ryan, që është në krye të programit të OBSH-së për emergjenca, ka thënë se koronavirusi është i thjeshtë, brutal dhe mizor.
“Është brutal në thjeshtësinë e tij, është brutal në mizorinë e tij, mirëpo nuk ka tru. Ne kemi trurin, ne mund ta mposhtim diçka që nuk ka tru, mirëpo tani nuk jemi duke bërë shumë punë të mirë”, ka deklaruar ai.