Numri i të infektuarve me koronavirus në Itali ende nuk e ka arritur pikun, ka thënë Instituti Kombëtar për Shëndetësi në këtë shtet, një ditë pasi më shumë se 6,150 persona kanë dalë pozitivë në testime dhe 712 kanë vdekur brenda 24 orëve.
“Ne ende nuk kemi arritur pikun dhe ende nuk e kemi kaluar atë”, ka thënë shefi i Institutit të Lartë të Shëndetësi, Silvio Brusaferro.
Megjithatë, Brusaferro ka thënë se ka shenja “të uljes” së numrit të të prekurve, duke sugjeruar se piku nuk mund të jetë larg, pas të cilit shifrat sërish do të fillojnë të ulen.
“Kur të fillojë ulja, sa e madhe do të jetë, varet nga sjellja jonë”, ka thënë Brusaferro, duke iu referuar italianëve dhe sjelljes së tyre gjatë ditëve të izolimit.
Sipas të dhënave të Universitetit, Johns Hopkins, aktualisht në Itali është raportuar për 80,589 persona të infektuar me sëmundjen Covid-19, që shkakton koronavirusi, derisa 8,215 të tjerë kanë vdekur.
Për lajmet e fundit rreth koronavirusit vizitoni blogun e Radios Evropa e Lirë.