Të paktën pesë policë dhe dhjetra qytetarë janë plagosur në protestën në Tiranë kur protestuesit dhe policia janë përplasur mes vete gjatë protestës së nëntë të organizuar nga opozita e Shqipërisë në Tiranë.
Ministri i Brendshëm i Shqipërisë, Aleksandër Lleshaj, përmes një postimi në Twitter ka thënë se pesë policë janë plagosur dhe janë shtruar në spital.
5 punonjës të Policisë së Shtetit të plagosur janë në Spitalin e Traumës, pasojë e ethes për pushtet të një grupi të papërgjegjshëm parapolitik. pic.twitter.com/0Rv2cQRx3i
— Sandër Lleshaj (@SanderLleshaj) April 13, 2019
Edhe opozita nga ana e saj ka folur për 15 protestues, mes tyre dhe gazetarë të cilët janë plagosur ose kanë pasur problem me frymëmarrjen për shkak të gazit të përdorur.
Në mbyllje të protestës, kryetari i Partisë Demokratike, Lulzim Basha, falënderoi protestuesit dhe tha se vetëm zgjedhjet e lira e të ndershme mund t’i kthejnë legjitimitetin Parlamentit.
“Ne luftojmë për një kauzë të drejtë, për një Qeveri të çliruar nga krimi, për zgjedhje të lira, rend dhe siguri. Klika e krimit e bërë njësh me qeverinë që kemi përballë do të shembet nga themelet”, shkroi Basha në Facebook.
Qytetarët që protestojnë kundër Qeverisë së kryeministrit Edi Rama, kanë hedhur mjete të forta, shashka dhe lëndë tymuese në drejtim të ndërtesës së Kryeministrisë dhe forcave të policisë, ndërsa këta të fundit kanë përdorur gazin lotësjellës për të shpërndarë turmën.
Protestuesit marshuan nga ndërtesa e Kryeministrisë te ndërtesa e Parlamentit, ku sërish u përleshur me policinë.
Përmes thirrjeve me megafon, policia i është drejtuar protestuesve dhe organizatorëve të protestës duke kërkuar nga ata që të mos hedhin lëndë piroteknike, fishekzjarrë, kapsolla dhe tymuese në drejtim të punonjësve të Policisë.
Përmes një postimi në Twitter, kryeministri Rama ka reaguar pas përshkallëzimit të situatës, gjatë protestës së opozitës.
Solidaritet me çdo punonjës policie që në ditë si kjo, duhet të përballet me ekseset fizike të një politike të dëshpëruar, pa kokë, pa drejtim, pa të nesërme! Keqardhje për policët e plagosur nga goditjet qorre të dy partive të verbuara, që marshojnë në rrugën e vetëshkatërrimit.
— Edi Rama (@ediramaal) April 13, 2019
Që prej muajit shkurt, opozita është larguar nga Parlamenti duke djegur mandatet e deputetëve të saj dhe duke filluar protestat kundër Qeverisë.
Ata kërkojnë që Qeveria e udhëhequr nga kryeministri Edi Rama të largohet dhe te krijohet një Qeveri transitore, deri në organizimin e zgjedhjeve të parakohshme.