Policia turke beson se mbetjet e trupit të vrarë të gazetarit saudit, Jamal Khashoggi, mund të jenë djegur.
Kështu bënë të ditur një raport i policisë të cilin e citon agjencia turke e lajmeve “Anadolu”.
Konsullata kishte dy puse dhe një furrë me gaz që mund të arrinte një nxehtësi mbi 1.000 shkallë, duke shkatërruar çdo gjurmë të ADN-së, thuhet në raportin e policisë turke.
Khashoggi, kolumnist i gazetës Washington Post, i cili ka qenë kritik i familjes mbretërore saudite, është vrarë në muajin tetor, pasi ka hyrë në konsullatën saudite në Stamboll.
Një vlerësim i CIA-s e ka fajësuar princin saudit të kurorës, Mohammed Bin Salman, për urdhërimin e vrasjes.
Sauditët kanë akuzuar 11 vetë për rastin, por mohojnë se princi i kurorës është i përfshirë.