Gjykata e Apelit e Kosovës e ndryshoi masën e arrestit ndaj deputetit të Kuvendit të Kosovës, Milaim Zeka, duke i caktuar arrest shtëpiak.
Në një komunikatë për media thuhet se “Gjykata e Apelit e ka pranuar si të bazuar ankesën e avokatit mbrojtës të të pandehurit M.Z., kundër caktimit të masës së paraburgimit prej një muaji".
"Aktvendimi i Gjykatës Themelore në Prishtinë, i datës 27.09.2018, është ndryshuar dhe ndaj personit në fjalë është caktuar masa e arrestit shtëpiak, e cila do të zgjasë deri më 26.10.2018”, thuhet në komunikatë.
Milaim Zeka, anëtar i Partisë Nisma Social-demokrate, dyshohet për kanosje ndaj prokurorit të Prokurorisë Speciale të Kosovës, Afrim Shefkiu, i cili ka ngritur aktakuzë kundër Zekës në Gjykatën Themelore në Prishtinë.
Policia e Kosovës, me vendim të Prokurorisë Themelore të Prishtinës, e ndaloi Zekën më 26 shtator.
Lexoni edhe këtë: Kërcënimet e deputetëve, ndërhyrje në punën e prokurorisë