Dy të dyshuarit në sulmin me agjent nervor në Sallsbëri kundër ish-agjentit rus, Sergei Skripal dhe vajzës së tij Yulia, do të ndalohen dhe gjykohen nëse ndonjëherë largohen nga Rusia, ka thënë ministri i Brendshëm britanik, Sajid Javid.
Mirëpo ai po ashtu ka pranuar se “realiteti është që ndoshta ata nuk do t’i shohim kurrë në Britani”.
Ai ka thënë për BBC-në se të dyshuarit mendohet se janë pjesë e Shërbimit të Inteligjencës Ushtarake të Rusisë, (GRU), dhe kanë shërbyer në bazë të urdhrave nga “nivelet më të larta” të Moskës.
Ish-spiuni rus, Sergei Skripal dhe vajza e tij, Yulia janë helmuar me agjent nervor në muajin mars.
Të dyshuarit kanë udhëtuar drejt Britanisë nga Moska më 2 mars dhe janë identifikuar si, Alexander Petrov dhe Ruslan Boshirov.
Dy ditë më vonë, policia ka thënë se të dyshuarit kanë hedhur agjentin nervor para derës së Skripalëve.
Sulmi ka lënë të sëmurë Skripal, 66 vjeçar dhe vajzën e tij, Yulia 33 vjeçare, për javë të tëra.
Javën e kaluar Britania është mbështetur nga Shtetet e Bashkuara, Franca, Gjermania dhe Kanadaja në një takim të Këshillit të Sigurimit të Kombeve të Bashkuara, të cilat janë pajtuar me deklarimet e Britanisë se “pothuajse me siguri”, Rusia ka miratuar helmimin.
Rusia në anën tjetër i ka cilësuar këto deklarata “të rreme” dhe ka cilësuar këtë situatë” histeri anti-ruse”.