Ushtarët e KFOR-it, nuk kanë marrë nën kontroll liqenin e Ujmanit mirëpo, prania e trupave është pjesë e një ushtrimi të planifikuar më herët, ka thënë për Radion Evropa e Lirë një zyrtar për media i KFOR-it.
Ndërkohë, që nga orët e mëngjesit janë parë ushtarë amerikanë që janë pjesë e NATO-s duke lëvizur në rrugët në veri të vendit. Disa automjete ushtarake janë duke qëndruar në hyrje të Hidrocentralit të Ujmanit.
Forcat e KFOR-it duke kontrolluar veriun e Mitrovicës
Më herët është raportuar se KFOR-i, ka marrë nën kontroll liqenin artificial të Ujmanit në veri të Kosovës, që është më i madhi në vend e që menaxhohet nga serbët.
"KFOR-i nuk ka marrë nën kontroll asgjë. KFOR-i ka mbajtur një ushtrim të planifikuar që dy ditë," ka thënë zyrtari i NATO-s.
"Ne kemi bërë një ushtrim të planifikuar në të gjithë Kosovën dhe jo vetëm në veri. Kjo është bërë për t'i testuar kapacitetet dhe gatishmërinë e ushtarëve të KFOR-it", ka thënë ai.