Fatos Bytyqi është vëlla i tre vëllezërve Bytyçi, Agronit, Ilirit dhe Mehmetit, të cilët ishin vrarë më 1999. Ata jetonin në Nju Jork, ndërkaq në periudhën 1998-99 kishin vendosur t'u bashkohen njësiteve të shqiptarëve të Kosovës në luftë kundër forcave serbe. Trupat e tyre u gjetën në qershor të vitit 2001, së bashku me trupat e pajetë të më se 70 shqiptarëve të Kosovës, në varrezën masive në Petrovo Sello në Serbi.
Në një bisedë për Radion Evropa e Lirë, Fatos Bytyçi thotë se nuk do të tërhiqet derisa të dalin para drejtësisë autorët që ekzekutuan vëllezërit e tij.
Ai beson se Qeveria e Serbisë e di se kush janë vrasësit e vëllezërve të tij dhe se ka argumente, por edhe dëshmitarë të mjaftueshëm të cilët duan të dëshmojnë për këtë rast. Edhe pse këta dëshmitarë nuk ndodhen në Serbi, ata, sipas Fatos Bytyçit, marrin kërcënime se nëse dëshmojnë, familjet e tyre në Serbi do të likuidohen.
“Unë jam takuar me kryeministrin Vuçiq më 2013, 2014 dhe 2015 në Uashington. Problemi është se të gjithë kriminelët e luftës, që janë përfshi në këtë apo edhe rastet tjera të krimeve, tani në Serbi janë biznismenët më të mëdhenj dhe njëherësh edhe kriminelët më të mëdhenj”, thotë Bytyçi.
Ky rast po zgjat qe 17 vjet.
“Ka dëshmitarë të këtij krimi të cilët e dinë se kush urdhëroi vrasjen e vëllezërve të mi. Të gjitha faktet i kanë, por nuk kanë dashur t’ia dorëzojnë drejtësisë”, ka thënë Bytyçi.
Ai thotë se u ka dorëzuar tashmë dokumentet dhe argumentet që posedon edhe zyrtarëve të lartë shtetëror të Serbisë, Ivica Daçiq dhe Aleksandar Vuçiq. Përmes këtyre fakteve, Bytyçi pretendon që ishte komandanti i Xhandarmërisë serbe, Goran Radosavleviq – ‘Guri’ ai që urdhëroi vrasjen e vëllezërve të tij.
“Kur ua kam dorëzuar këto dokumente ata u tronditën. U thash, ja ku i keni, le t’i ketë edhe Ministria e Punëve të Brendshme e Serbisë. Po ashtu, ia kam dorëzuar edhe kryeministrit Vuçiq. Të gjithë ishin të shokuar me faktet se “Guri” kishte dhënë urdhrin për likuidimin e vëllezërve të mi”, thotë Bytyçi.
Ai pretendon se dëshmitarët e këtij rasti i kanë treguar se kush qëndron pas krimit. Ndërkaq, kërcënimet dhe frikësimet i shtyjnë këta dëshmitarë që të mos ndërmarrin hapin tutje, drejt drejtësisë.
“Dëshmitarët nuk thonë përmes telefonit se “Guri” po i kërcënon, sepse u përgjohen telefonat. Por, thonë se vazhdimisht kërcënohen se nëse flasin apo bëhen dëshmitarë do ta likuidojmë familjen në Serbi”, thekson tutje Bytyçi.
Sipas tij, organet e drejtësisë në Serbi, nuk kanë guxuar ta akuzojnë Goran Radosavleviqin i njohur si “Guri”. Andaj, pavarësisht premtimeve të Vuçiqit në Uashington për zgjidhjen e këtij rasti, diçka e tillë nuk ka ndodhur.
“Në Serbi nuk ka program për mbrojtjen e dëshmitarëve dhe kjo paraqet problem të madh. “Guri” është çelësi për zgjidhjen e rastit Bytyçi, ngase ai ka urdhëruar vrasjen”, është shprehur ai.
Sidoqoftë, Fatos Bytyçi shprehet i vendosur që ta vazhdojë rastin deri në zbardhjen e plotë dhe vënien para drejtësisë të atyre që urdhëruar vrasjen. Ai thotë se nuk do të tërhiqet përderisa të jetë gjallë nga ky qëllim.
“Nëse unë vdes, biri im, vëllezërit e mi do të vazhdojnë të luftojnë për këtë synim”, ka thënë Fatos Bytyçi.
Zbardhja e rastit të vrasjes së vëllezërve Bytyçi, me shtetësi amerikane, është ngritur lartë në politikën amerikane, e cila i ka kumtuar edhe qeverisë së Serbisë se ky rast reflekton drejtpërdrejtë në marrëdhëniet midis dy shteteve. (REL)