Çmimet e naftës kanë shënuar të mërkurën rënie rekorde.
Nafta e papërpunuar Brent ka rënë në 34.88 dollarë për fuçi në Londër, për herë të parë në 11 vjet.
Në Shtetet e Bashkuara, ndërkaq, çmimi i naftës së papërpunuar ka rënë për 3.3 përqind, përkatësisht në 34.77 dollarë për fuçi.
Çmimet e naftës në botë kanë rënë për 70 përqind qysh në mes të vitit 2014.
Kësaj i ka kontribuar furnizimi i tepërt global, si dhe vendimi i Kongresit të Shteteve të Bashkuara për t’i dhënë fund ndalesës 40-vjeçare të eksportit të naftës së papërpunuar, që prodhohet në vend.
Organizata e Vendeve Eksportuese të Naftës, historikisht, ka shkurtuar prodhimin për të mbështetur çmimet.
Por, e udhëhequr nga Arabia Saudite - deri më tash anëtarja më e fuqishme e organizatës - ajo ka refuzuar të shkurtojë furnizimin këtë herë.