Republika e Kosovës, që nga viti 2013 ka filluar me grumbullimin e rezervave shtetërore të mallrave, si produkte esenciale ushqimore, agro-ushqimore dhe produkte të derivateve të naftës, thonë zyrtarë qeveritarë.
Ndonëse në këtë plan strategjik parashihet edhe lista me barnat esenciale, një gjë e tillë mungon.
Shaban Halimi, drejtor i Departamentit të rezervave shtetërore të mallrave, që funksionon në kuadër të Ministrisë së Tregtisë dhe Industrisë, jep hollësi:
“Për këtë vit planifikohet që të bëjmë programin 2016- 2018, ku do ta fusim listën e barnave esenciale dhe materialit shpenzues, nëse kemi dëmtime. Kjo, sipas Ligjit për rezerva shtetërore, pasi ligji, përpos produkteve tjera, parasheh edhe barnat dhe po planifikojmë që vitin e ardhshëm të kemi edhe barna rezervë”.
Bekim Fusha, nga departamenti i Farmacisë në Ministrinë e Shëndetësisë, thotë se ende nuk është përpiluar lista e nevojshme që parashihet në planin strategjik për rezerva shtetërore.
“Sa i përket barnave për nevojat e rezervave shtetërore, ështëthemeluar grupi punues, i cili udhëhiqet prej disa ministrive. Hapat që janë ndërmarrë lidhur me këtë përpilim të listës, janë kërkuar mendime të shumta nga specialistë, si ata të emergjencës për përmbylljen e listës. Grupi është duke punuar dhe presim që kjo listë të finalizohet”, thotë Fusha.
Ndërkaq udhëheqësi i Klinikës emergjente në Qendrën Klinike Universitare, Basri Lenjani, pohon se kanë hartuar pakon emergjente dhe komisioni mjekësor ka arritur t’i përcaktojë objektivat e barnave dhe mjeteve tjera përcjellëse që do të shërbejnë në menaxhimin e situatave emergjente, derisa shton se kjo listë do të dorëzohet së shpejti.
“Është përpiluar në përgjithësi drafti kryesor i pakos emergjente, ku përfshihen materiali shpenzues, barnat për 10 mijë banorë për kohëzgjatje prej 3 muajsh. Kostoja financiare është e shtrenjtë dhe arrin në 300 mijë euro”.
“Tani po presim edhe rekomandimet e drejtorëve të klinikave brenda Qendrës Klinike Universitare të Kosovës dhe e kemi menduar që para shtatorit ky dokument, në dy javët e ardhshme, do të dorëzohet në Qeveri për miratim”, bën të ditur Lenjani.
Sidoqoftë, ekspertë të kësaj fushe, konsiderojnë se sasia e rezervave shtetërore në përgjithësi, është shumë e vogël.
Rezervat shtetërore të mallrave shfrytëzohen për nevoja të furnizimit në raste lufte, apo rrezikut të drejtpërdrejtë nga lufta dhe në raste të fatkeqësive natyrore të përmasave të mëdha.