Rreth 3,000 njerëz janë mbledhur në qendër të Beogradit, në një protestë antiqeveritare të organizuar nga ultranacionalisti serb, Vojisllav Sheshel.
Sheshel, i cili përballet me akuzat për krime lufte, është kthyer të mërkurën nga Tribunali i Hagës, pasi gjykata e Kombeve të Bashkuara e ka liruar atë për shkaqe shëndetësore.
Ai ka thirrur protestën një ditë pasi është kthyer, duke kërkuar “mobilizim masiv të patriotëve serbë kundër qeverisë aktuale pro-perëndimore”.
“Nuk do të presim që të përfundojë mandati i plotë i kësaj qeverie. Ne do të kemi zgjedhje vitin e ardhshëm”, u ka thënë Sheshel të tubuarve.
Mbështetësit e tij kanë valvitur flamuj të Serbisë, së bashku me fotografi të Sheshelit dhe presidentit rus, Vladimir Putin.
Qeveria e Serbisë kryesohet tani nga presidenti Tomisllav Nikolliq dhe kryeministri Aleksandar Vuçiq.
Të dy ata kanë lënë Partinë e Sheshelit më 2008 dhe kanë formuar Partinë Përparimtare Serbe.
Sheshel akuzohet për krime lufte në Bosnje dhe Kroaci.