Kosova duhet ta fitojë luftën kundër ekstremizmit e radikalizmit fetar sikurse edhe atë kundër korrupsionit, ka deklaruar presidentja e Kosovës, Atifete Jahjaga.
Këto komente, Jahjaga i ka bërë në takimin e Këshillit Kombëtar Kundër Korrupsionit.
Aty, Jahjaga ka përgëzuar organet e ndjekjes penale për aksionet e fundit kundër personave të dyshuar për përfshirje në lufta fetare e aktivitete të dyshuara terroriste, duke u zotuar se një përkushtim i tillë i institucioneve të Kosovës do të vazhdojë edhe në të ardhmen.
“Dua që të përgëzoj punën e përbashkët të institucioneve të sigurisë dhe drejtësisë për trajtimin që i kanë bërë kërcënimit të sigurisë kombëtare nga ekstremizmi dhe radikalizmi. Puna e tyre ka vërtetuar që të gjithë ne duhet të përkrahim kredibilitetin dhe efikasitetin e institucioneve tona të rendit dhe ligjit. Mekanizmat tonë institucional kanë dëshmuar se i kanë kapacitetet për t’u ballafaquar në mënyrë kredibile me fenomenet të cilat cenojnë frymën dhe vlerat mbi të cilat po e ndërtojmë shtetin tonë”, ka thënë Jahjaga.
Një përqendrim të veçantë në fjalimin e saj, presidentja Jahjaga kishte korrupsionin si një prej dukurive më negative të shtetit të Kosovës.
Përkundër zotimit për “zero tolerancë” ndaj korrupsionit, Jahjaga ka thënë se institucionet e shtetit nuk e kanë fituar ende këtë luftë dhe se vendi lëngon nga ky fenomen negativ.
Reforma në sistemin e drejtësisë po aq sa edhe lufta kundër korrupsionit dhe krimit të organizuar, sipas presidentes Jahjaga, do të jenë tregues i përparimit të Kosovës në rrugën drejt integrimeve evropiane dhe liberalizmit të vizave.
“Ne nuk e kemi kryer tërësisht punën tonë. Sepse edhe nga kjo reforme e sistemit të drejtësisë, po aq sa lufta kundër korrupsionit e në veçanti ndaj krimit të organizuar, varet përparimi në rrugën tonë të integrimeve evropiane. Për më tepër varet procesi i liberalizimit të vizave. Nuk duhet të lejojmë që korrupsioni të bëhet normë e pranueshme shoqërore ose taksë që duhet paguar”, ka theksuar Jahjaga.
Presidentja e Kosovës ka kërkuar zgjidhjen sa më të shpejt të lëndëve të grumbulluara, sepse një veprim i tillë sipas saj, do ta ndihmonte luftën kundër korrupsionit.
Për këtë qëllim, ajo ka konfirmuar se ka dekretuar edhe 17 prokurorë të rinj.
Ndërkohë që kryesuesi i Këshillit Gjyqësor të Kosovës, Enver Peci ka thënë se veprat penale të natyrës korruptive do të trajtohen me prioritet, në mënyrë që lufta e nisur kundër kësaj dukurie të jetë sa më efikase.
“Është vendosur që lëndët e korrupsionit të kenë prioritet në zgjidhje dhe janë vendosur jashtë kategorisë së strategjisë së lëndëve të vjetra, kështu që gjyqtarët janë të obliguar që lëndët e kësaj natyre t’i marrin me prioritet”, ka thënë Peci.
Gjatë këtij takimi, ushtruesi i detyrës së Kryeprokurorit të Shtetit, Sylë Hoxha ka thënë se janë trajtuar vepra të krimeve të rënda dhe janë sekuestruar edhe pasuri në vlerë prej mbi 27 milionë euro.