Në kryeqytetin e Iranit janë shtrënguar masat e sigurisë pas protestave të së dielës. Gjatë natës, helikopterët fluturonin mbi qytet dhe disa të shtëna u dëgjuan në pjesën veriore të Teheranit, e cila është fortesë e liderit të opozitës, Mir Hosein Musavi.
Musavi u ka bërë thirrje përkrahësve të tij që t’i vazhdojnë protestat kundër rizgjedhjes së presidentit radikal, Mahmud Ahmadinexhad.
Televizioni shtetëror njoftoi se 10 njerëz u vranë dhe mbi 100 u plagosën në protestat e së shtunës.
Muhamed Katami, aleat i Musavit dhe ish-president reformator, paralajmëroi për “pasoja të rrezikshme” nëse njerëzit pengohen t’i shprehin kërkesat e tyre në mënyrë paqësore.
Mediat shtetërore njoftuan se vajza dhe katër familjarë të ish-presidentit Hashemi Rafsanxhani ishin arrestuar, për shkak të pjesëmarrjes në protesta, por më pas ishin liruar.
Presidenti amerikan, Barak Obama, ka shprehur shqetësim për dhunën dhe “veprimet e padrejta” ndaj protestuesve në takimin me këshilltarët e tij, të cilët e informojnë për zhvillimet në Republikën Islamike.
Ahmadinexhad i akuzoi Shtetet e Bashkuara dhe Britaninë e Madhe për ndërhyrje në punët e Iranit, por sekretari i Jashtëm britanik, Dejvid Milliband, i hodhi poshtë akuzat, ndërsa kancelarja gjermane, Angela Merkel, i bëri thirrje Iranit që të lejojë protesta paqësore dhe t’i rinumërojë rezultatet e votimeve.
* * * * * * * * * *
Ndërkaq, ditë më parë, lideri suprem i Iranit, ka bërë thirrje për ndaljen e protestave, pasi që, sipas tij, për rezultatin e zgjedhjeve është vendosur në kutitë e votimeve dhe nuk mund të vendoset në rrugë.
Hamnei, po ashtu, ka mohuar të ketë pasur mashtrime në zgjedhjet e 12 qershorit, në të cilat, sipas autoriteteve, me shumicë votash ka fituar presidenti Mahmud Ahmadineaxhad dhe ka shtuar se liderët politikë do të përgjigjen për çfarëdolloj dhune.
