Yevgeny Prigozhin, themeluesi i grupit paraushtarak rus Wagner, kërcënoi se do të tërhiqte mercenarët e tij nga qyteti i sulmuar ukrainas i Bahmutit nëse problemet e furnizimit me municion nuk zgjidhen.
Kjo deklaratë erdhi pasi Presidenti ukrainas, Volodymyr Zelenskiy kërkoi ndihma me sisteme moderne të mbrojtjes ajrore pas një prej sulmeve më vdekjeprurëse ruse ndaj civilëve në muajt e fundit.
Në një intervistë të publikuar më 29 prill, Prigozhin tha se do të "detyrohet të tërheqë disa njësi" nga Bahmuti nëse Wagner nuk merr së shpejti më shumë municion, duke vazhduar një ankesë që ai ka shprehur prej javësh.
Bahmut, një qendër kryesore transporti në rajonin e Donjeckut, ka qenë vendi i luftimeve më të zjarrta gjatë disa muajve të fundit me numër të madh të viktimave te të dyja palët.
Zyrtarët ushtarakë ukrainas kanë thënë se humbja e Bahmutit, e cila ndodhet në kodra, duke ofruar një mbrojtje natyrore, do të hapte trupat e saj të vendosura në pjesë të tjera të Donjeckut ndaj sulmeve.
Wagner ka udhëhequr përpjekjet ruse për të marrë Bahmutin që nga viti i kaluar, por nuk ka qenë në gjendje të largojë luftëtarët ukrainas, të cilët ende mbajnë cepat perëndimore të qytetit.
Prigozhin paralajmëroi se një tërheqje e Wagnerit nga Bahmuti do të çonte në një kolaps rus përgjatë pjesëve të tjera të frontit prej 1000 kilometrash.
Ndërsa Prigozhin foli, forcat ruse vazhduan presionin në vijën e frontit Bahmut-Adviyivka-Maryinka, duke nisur 48 sulme të pasuksesshme në pozicionet ukrainase, tha Shtabi i Përgjithshëm i Forcave të Armatosura të Ukrainës në përditësimin e tij të përditshëm më 29 prill.
Ndërkohë Zelenskiy u bëri thirrje aleatëve dhe partnerëve të Ukrainës që të furnizojnë Ukrainën me mbrojtje më të mirë ajrore pasi të paktën 25 persona, përfshirë disa fëmijë, u vranë në një valë sulmesh ruse në qytetet ukrainase, përfshirë kryeqytetin, Kiev, më 28 prill.
Më i godituri ishte Uman, një qytet në rajonin Cherkasy të Ukrainës qendrore, ku të paktën 23 persona, përfshirë katër fëmijë, u vranë kur një raketë ruse goditi një ndërtesë apartamentesh nëntëkatëshe, sipas Ministrisë së Brendshme të Ukrainës.Rreth 109 persona besohet të kenë banuar në pjesën e ndërtesës që u godit.
Këshilli i qytetit të Umanit shpalli një periudhë zie tre-ditore dhe prokurorët kanë hapur një hetim për krimet e luftës, thanë autoritetet.
"Mbrojtje ajrore, avionë modernë, pa të cilët nuk ka mbrojtje ajrore plotësisht efektive, artileri, automjete të blinduara. Gjithçka që është e nevojshme për të ofruar siguri në qytetet tona, në fshatrat tanë, si në brendësi ashtu edhe në vijën e frontit," Zelenskiy tha në fjalimin e tij të natës vonë më 28 prill.
Më herët, Zelenskiy i dënoi sulmet si "një natë terrori rus"."E keqja ruse mund të ndalet me armë - mbrojtësit tanë po e bëjnë këtë. Dhe mund të ndalet me sanksione - sanksionet globale duhet të rriten",tha ai.
Komanda e Forcave Ajrore të Ukrainës më vonë raportoi se sulmi i shumëanshëm në qytetet ukrainase u ekzekutua nga bombarduesit strategjikë rusë Tu-195 që vinin nga rajoni i Detit Kaspik.Shtetet e Bashkuara dhe disa aleatë i kanë dhënë Ukrainës disa sisteme raketore ‘Patriot’, të konsideruara si një nga armët më të avancuara të mbrojtjes në arsenalin e NATO-s. Çdo sistem Patriot mund të mbrojë një qytet.
Aleatët perëndimorë i kanë dhënë Ukrainës gjithashtu sisteme të tjera të mbrojtjes ajrore, por raportet e zbulimit të SHBA-së së fundmi kanë treguar se mbrojtja ajrore e Ukrainës mbetet një hallkë e dobët.
“Nata e terrorit rus” ndaj qyteteve ukrainase
