Ligjvënësi rus: Luftëtarëve të Wagnerit u premtohet amnisti nëse çarmatosen
Mercenarëve të Wagnerit u është premtuar amnistia nëse i dorëzojnë armët, por duhet të veprojnë shpejt, ka thënë agjencia ruse e lajmeve TASS, duke e cituar një ligjvënës rus.
“Luftëtarët e Wagnerit ende mund t’i ulin armët dhe t’i shmangen ndëshkimit, duke marrë parasysh arritjet e tyre përgjatë operacionit special ushtarak në Ukrainë, por ata duhet të veprojnë shpejt”, ka thënë ligjvënësi rus Pavel Krasheninnikov, sipas TASS-it.
Ushtria ruse raportohet të ketë sulmuar Wagnerin
Ushtria ruse është raportuar të ketë qëlluar ndaj pjesëtarëve të Wagnerit që po avancojnë drejt Moskës, pasi kanë hyrë në orët e para të së shtunës në qytetin jugperëndimor rus, Rostov-on-Don.
Një korrespodent i agjencisë së lajmeve Reuters, ka raportuar se ka qenë dëshmitar kur helikopterët ushtarakë rusë kanë hapur zjarr në një kolonë të Wagnerit, disa orë pasi shefi i grupit, Yevgeny Prigozhin ka thënë se forcat e tij i kanë pushtuar zonat ushtarake në Rostov-on-Don.
Kolona e Wagnerit besohet se është sulmuar pasi e ka kaluar qytetin Voronezh, që gjendet rreth 600 kilometra në veri të Rostov-on-Donit.
Sipas Reutersit, në kolonë ka pasur transportuese ushtarësh dhe të paktën një tanke.
Kush është Yevgeny Prigozhin?
Yevgeny Prigozhin, ish i burgosur dhe udhëheqës i një rrjeti të restoranteve, e ka rritur kompaninë private mercenare Wagner dhe është bërë figurë kyçe në Rusi - pas nisjes së luftës në Ukrainë - por edhe kritik i palodhshëm i komandës ushtarake ruse.
Ai tani ka nisur rebelim të hapur ushtarak kundër shtetit rus.
Prigozhin ka lindur më 1961 në atë që atëherë është quajtur Leningrad.
Si adoleshent ai është zënë dhe dënuar për vjedhje – një prej plot krimeve më serioze që ka kryer më vonë, përfshirë vjedhje të armatosur dhe trafikim të fëmijëve, për çka është dënuar me mbi nëntë vjet burgim.
BE-ja aktivizon qendrën e krizave pas situatës së krijuar në Rusi
Kryediplomati i Bashkimit Evropian, Josep Borrell, ka thënë se blloku evropian e ka aktivizuar qendrën për kriza, pas situatës së krijuar në Rusi.
“E pata një thirrje me ministrat e Grupit të shtatë shteteve më të industrializuara (G7) për të shkëmbyer pikëpamjet tona për situatën në Rusi. Para takimit të së hënës në Këshillin e BE-së për Punë të Jashtme, unë po aktivizoj qendrën për përgjigje ndaj krizave”, ka thënë ai në Twitter.
Përgjatë natës, mercenarët e Wagnerit kanë hyrë në qytetin rus Rostov-on-Don dhe janë duke lëvizur drejt Moskës.
Lideri i tyre, Yeveny Prigozhin ka thënë se dëshiron t’i largojë personat e korruptuar nga ushtria, të cilët i fajëson për rezultatin e luftës në Ukrainë.