Rusia bombardon qytetin e Odesës, raportohet për 19 civilë të vrarë

Shërbimet ukrainase të urgjencës bënë të ditur mëngjesin e së premtes se sulmet ruse me raketa kanë goditur ndërtesat e banimit në rajonin e Odesës në Ukrainë, duke shkaktuar 19 viktima dhe duke lënduar dhjetëra të tjerë.

Pushtimi rus i Ukrainës

REL ju sjell informacionet kryesore mbi pushtimin rus të Ukrainës, përfshirë analiza, video dhe fotogaleri.

"Numri i të vdekurve në ndërtesë ka arritur në 19", tha zëdhënësi i administratës ushtarake të Odesës, Sergei Bratchuk, duke shtuar se raketa u lëshua nga një aeroplan që vinte nga Deti i Zi.

Videoja e sulmit të së premtes tregoi rrënojat e djegura të ndërtesave në Odesa.

Një raketë e dytë që goditi rrethin Bilhorod-Dnistrovskyi të Odesës vrau tre persona, përfshirë një fëmijë dhe plagosi një person tjetër, sipas deklaratës së Ministrisë së Punëve të Brendshme të Ukrainës.

Raketa e dytë goditi ndërtesat tre dhe katërkatëshe të një qendre rekreacioni, shkroi ministria në Twitter.

Sulmi i së premtes në Odesa pason tërheqjen e forcave ruse të enjten nga Ishulli i Gjarprit, një ishull kyç i Detit të Zi. Por, forcat ruse vazhduan ofensivën e tyre për të rrethuar bastionin e fundit të rezistencës në provincën lindore të Luhanskut.

Sipas deklaratës së një gjenerali ukrainas, Rusia ka goditur 68 objekte civile në gjysmën e dytë të qershorit.

SHIKONI EDHE:

OKB: 16 milionë njerëz në Ukrainë kanë nevojë për ndihmë humanitare

Oleksii Hromov më herët tha se numri i sulmeve me raketa ruse në Ukrainë ishte dyfishuar në dy javët e fundit dhe se Moska po përdorte raketa me saktësi të ulët të epokës sovjetike në më shumë se gjysmën e sulmeve.

Rusia përdori një raketë të epokës sovjetike Kh-22 në sulmin në qendrën tregtare të mbushur me njerëz në qytetin qendror të Kremençukut të hënën, ku u vranë të paktën 18 persona, sipas autoriteteve ukrainase.

Kremlini ka hedhur poshtë raportet e zyrtarëve ukrainas se raketat ruse goditën zonat e banuara në Odesa dhe përsëriti pretendimet se Moska nuk shënjestron civilët.

“Dëshiroj t’ju kujtoj fjalët e presidentit se Forcat e Armatosura Ruse nuk punojnë me objektiva civile”, tha zëdhënësi i Kremlinit Dmitry Peskov në një konferencë me gazetarët.

Rusia vazhdimisht mohon të ketë shënjestruar civilët në Ukrainë.

Qendra e Odesës, një qytet kyç ukrainas pranë Detit të Zi, në jugperëndim të vendit, është kthyer në një zonë të fortifikuar. Pozicionet mbrohen nga ushtarë ukrainas, të cilët vëzhgojnë zbarkimet eventuale ajrore ose detare të forcave ushtarake ruse.