Disa qindra qytetarë të Shqipërisë kanë protestuar pranë Ministrisë së Brendshme në Tiranë, për të kundërshtuar shembjen e Teatrit Kombëtar. Në këtë lokacion, dy ditë më parë ishte ndërtesa e Teatrit.
Partitë opozitare përkrahën protestën dhe së bashku me qytetarët kërkuan largimin e kryetarit të Bashkisë së Tiranës.
Opozita tha se qeveria ka penguar ardhjen e qytetarëve e protestuesve të tjerë në kryeqytet.
Protesta, përveç disa përplasjeve dhe shtyrjeve në raste të izoluara, kaloi e qetë.
Ndërtesa e Teatrit Kombëtar në Shqipëri është shembur të dielën rreth orës 4:30 të mëngjesit, duke ngjallur reagime të ashpra nga qytetarët e artistët që ishin kundër shembjes së saj.
Edhe prezenca ndërkombëtare në Shqipëri ka reaguar duke thënë se kjo çështje është dashur të zgjidhet me dialog dhe se e shohin këtë si një mundësi të humbur.
Komisioni Evropian ka shprehur keqardhjen që autoritetet shqiptare nuk ndoqën rekomandimin për dialog, duke vijuar me planet e shembjes së Teatrit Kombëtar.
“Teatri u shemb në kohën kur ne kishim kërkuar dialog mes autoriteteve dhe shoqërisë civile, para se të ndërmerrej një vendim i pakthyeshëm. Shprehim keqardhje që rekomandimi ynë nuk u ndoq”, tha zëdhënësja Ana Pisonero Hernandez.
Ajo shtoi se Komisioni Evropian ndoqi me shqetësim të thellë zhvillimet në terren, veçanërisht pasi konstatoi përdorimin e forcës.
“Vazhdojmë t’u bëjmë thirrje të gjitha palëve të tregojnë përmbajtje”, tha zëdhënësja e Komisionit Evropian.
Kryeministri i Shqipërisë, Edi Rama ka postuar në Facebook planin për projektin e ri të ndërtimit të teatrit.
Ai shkroi se i siguron qytetarët se “Teatri i ri Kombëtar do të ketë nesër pëlqimin e të gjithëve, qoftë të të shumtëve që e kërkojnë sot dhe qoftë të të paktëve që sot nuk shohin më larg se dje”.
Debati për shembjen apo mosshembjen e Teatrit Kombëtar, ka vazhduar për dy vjetët e fundit.
Qeveria dhe Bashkia e Tiranës kanë thënë se teatri i ri është pjesë e planeve për zhvillimin e qytetit. Ata kishin miratuar një ligj special në parlament, që një firmë private ta ndërtonte objektin e ri. Por, pas protestave dhe reagimeve të shumta, ky plan ishte pezulluar.
Disa ditë më parë, përmes një vendimi të qeverisë, Teatri Kombëtar kaloi si pronë e Bashkisë së Tiranës.
Aleanca për Mbrojtjen e Teatrit kërkonte restaurimin e ndërtesës 80-vjeçare, pa e shembur atë. Tani, pas shembjes, ata kërkojnë ndërtimin e një teatri të ri me arkitekturën identike të atij të vjetrit.
