Gjashtë persona janë qëlluar për vdekje në një paradë të Ditës së Pavarësisë së SHBA-së, 4 korrik, pranë qytetit amerikan të Çikagos, thonë zyrtarët e qytetit.
Ngjarja në Highland Park, periferi e Çikagos, u ndërpre papritur rreth 10 minuta pasi filloi, kur u dëgjuan disa të shtëna.
Zyrtarët e policisë thanë se jan ende në kërkim të një burri të bardhë, të moshës 18-20 vjeç, i përshkruar si "i armatosur dhe i rrezikshëm".
Autoritetet e qytetit e përshkruan incidentin si "aktiv" dhe thanë se 24 persona janë shtruar gjithashtu në spital.
Oficerët e zbatimit të ligjit, të cilët janë në kërkim të të dyshuarit, kanë siguruar një perimetër rreth zonës në qendër të Highland Park dhe kanë gjetur "prova të një arme zjarri", thuhet në deklaratë.
Duke folur në një konferencë për shtyp, komandanti i policisë lokale, Chris O'Neill e përshkroi sulmuesin si një mashkull të ri të bardhë i cili është "i armatosur dhe i rrezikshëm".
"Në një ditë që ne u mblodhëm për të festuar komunitetin dhe lirinë, ne po mbajmë zi për humbjen tragjike të jetës", tha kryebashkiaku i qytetit Nancy Rotering.
Banori vendas Miles Zaremski tha për Chicago Sun-Times: "Dëgjova 20 deri në 25 të shtëna, të cilat ishin të njëpasnjëshme. Kështu që nuk mund të ishte thjesht një pistoletë apo një armë gjahu".
"Ky është një incident aktiv," thanë zyrtarët e qytetit në një përditësim të postuar në faqen e internetit të Highland Park, duke këshilluar ata në zonë që të "strehohen në vend".
Kongresmeni Brad Schneider, i cili përfaqëson distriktin, shkroi në Twitter se "po dëgjonte për humbje jete".
Kryebashkiaku i Parkut Highland tha se festivali ishte anuluar dhe u kërkoi njerëzve të shmangnin zonën në qendër të qytetit.
Fotografitë e postuara në mediat sociale sugjerojnë se një përgjigje e madhe e shërbimeve emergjente është dërguar në zonë.
