Sfidat gjatë kufizimit të lëvizjes

Shpallja e gjendjes së jashtëzakonshme dhe vendosja e orës policore, sipas Qeverisë së Maqedonisë së Veriut, nuk i kufizon të drejtat e qytetarëve, por ndihmon në mbrojtjen e shëndetit të tyre.

Ndërkaq, ekspertët juridikë thonë se kufizimet në lëvizje, të vendosura nga qeveria, duhet të jenë të definuara qartë, me qëllim që të arrijnë qëllimet e tyre.

Nga e diela, për çdo natë nga ora 21:00 aplikohet ora policore, e cila zgjatë deri në orën 6:00. Kjo masë u vendos me qëllim të parandalimit të përhapjes së koronavirusit të ri, teksa autoritetet në vend kanë paralajmëruar se mund të vendosin edhe masa më të ashpra, nëse është e nevojshme.

Gjatë orës policore, të gjithë qytetarët në Maqedoninë e Veriut e kanë të ndaluar të dalin nga shtëpitë e tyre, përpos pjesëtarëve të sigurisë, punëtorëve shëndetësorë, punëtorëve që punojnë në higjienën komunale si dhe punonjësit e medieve.

Gjatë natës së parë të orës policore, nga Policia kanë bërë të ditur se janë lëshuar 74 paralajmërime dhe janë ndaluar 18 qytetarë.

Ministri i Punëve të Brendshme, Naqe Çulev ka kërkuar që ndalesa e lëvizjes, të bëhet nga ora 18:00 deri dhe të zgjasë deri në orën 6:00.

“Angazhohem për kufizim më rigoroz të lëvizjeve të qytetarëve me qëllim të pengimit të përhapjes së COVID-19”, ka theksuar ministri Çulev.

• Zërijeta Hajro Jajaga

Rrugët e Çarshisë së vjetër të Shkupit si asnjëherë më parë janë të zbrazëta për shkak të koronavirusit. Pjesa më e madhe e dyqaneve janë të mbyllura. Ata pak pronarë që kanë vendosur të hapin dyqanet, thonë se nuk mbajnë mend një pamje të këtillë për pesë dekada. Xhamitë që janë pjesë e Çarshisë së Shkupit mbeten të mbyllura për të ruajtur distancën sociale, si masë për parandalimin e përhapjes së virusit.

Mirjana Najçevska, ish-kryetare e Komitetit të Helsinkit, thotë për Radion Evropa e Lirë se kufizimet e vendosura nga qeveria, duhet të definohen qartë, në mënyrë që të arrijnë qëllimin për çka janë vendosur.

“Çdo kufizim duhet të jetë i definuar qartë, edhe sa i përket periudhës dhe aspektit funksional, pra të dihet pse bëhet. Po ashtu të bëhet e qartë se për sa kohë do të zgjasë dhe në çfarë mënyre do të kontribuojë në të mirën publike dhe shëndetin publik. Do të thotë, kufizimet duhet të sqarohen qartë për arritjen e qëllimit maksimal”, thotë Najçevska.

Por, Bashkim Selmani, ligjërues në Fakultetin Juridik në Universitetin e Tetovës, thotë për Radion Evropa e Lirë se me kufizimin e lëvizjes nuk shkelen të drejtat e qytetarëve. Përkundrazi, ai thotë se me këtë masë qytetarëve u mundësohet të gëzojnë të drejtën e jetës, duke parandaluar përhapjen e COVID-19, që për grupe të caktuara të shoqërisë mund të ketë pasoja fatale.

SHIKONI EDHE:

Shënohet viktima e dytë nga koronavirusi në Maqedoninë e Veriut

Selmani thotë se beteja me koronavirusin është shumë më e vështirë se sa një luftë klasike, andaj ai thotë se kufizimet e vendosura nga autoritetet janë të domosdoshme.

“Edhe kjo liri që është aktualisht duhet kufizuar sepse një pjesë e popullatës nuk po i respekton rekomandimet që të mos dilet jashtë shtëpisë pa nevojë, kur tashmë dihet se pasojat mund të jenë shumë të rënda”.

“Prandaj, edhe lëvizja e qytetarëve duhet të kufizohet pak më tepër për çështje të caktuara. Ndërkaq, kompanitë që merren me prodhim, detyrimisht duhet të funksionojë pasi pas një periudhe të caktuar, ndalesa e tërësishme e kompanive prodhuese mund të shkaktojë një konflikt social që mund të çojë deri te mungesa e ushqimeve”, thotë Selmani.

Që prej 26 shkurtit, kur u shfaq rasti i parë me koronavirus në Maqedoninë e Veriut, autoritetet vendosën një sërë masash, si mbylljen e kufijve, aeroporteve, shkollave. Po ashtu u ndaluan edhe tubimet dhe u shtyn zgjedhjet parlamentare, që ishin paraparë të mbaheshin më 12 prill.

Komuna e Dibrës dhe ajo e Zhupës, për shkak të numrit të madh të personave të infektuar me COVID-19 janë vendosur në karantinë.