Të paktën një person është vrarë nga një sulm raketor rus në kryeqytetin e Ukrainës, Kiev, tha kryebashkiaku i qytetit, Vitali Klitschko.
Kievi është sulmuar me raketa nga Rusia. Ky duket të jetë një sulm mbarëkombëtar, pasi sulme të njëjta po raportohen edhe në Zaporizhja Mykolaiv, Chernihiv dhe vende tjera.
Sipas Klitschkos, mes atyre që u goditën janë edhe dy ndërtesa banimi afër qendrës së Kievit. Ai tha se disa raketa ruse janë rrëzuar me sukses, dhe se ekipet e shpëtimit janë në vendin e ngjarjes.
Ai tha se si pasojë e këtij sulmi të paktën gjysma e popullsisë së Kievit ka mbetur pa energji elektrike.
Presidenti ukrainas, Volodymyr Zelensky, tha se 85 raketa janë lëshuar kundër Ukrainës të martën dhe 20 të tjera pritet të godasin vendin.
Presidenca ukrainase tha se rreth shtatë milionë familje kanë mbetur pa energji elektrike si pasojë e sulmeve.
Zyrtarët atje thonë se banorët po qëndrojnë të strehuar në vende të ndryshme nga frika e sulmeve të tjera.
Ky sulm po ndodhë derisa liderët botërorë janë mbledhur në Bali të Indonezisë në samitin e G20-tës, apo grupit të vendeve më të industrializuara, ku kanë dënuar pushtimin rus të Ukrainës.
Zelensky u tha liderëve botërorë më 15 nëntor, përmes video-lidhjes, se koha për t’i dhënë fund luftës së Rusisë në Ukrainë është “tani”.
Andriy Yermak, shefi i zyrës së tij, tha se ky sulm "masiv" raketor është "përgjigjja" e Rusisë ndaj fjalimit të presidentit të Ukrainës në samitin e G20-ës.
“A mendon dikush se Kremlini dëshiron seriozisht paqen? Kremlini dëshiron bindje. Por, në fund terroristët humbasin gjithmonë”, shkroi ai në Twitter.
Shtetet e Bashkuara kanë dënuar ashpër këto sulme.
Këshilltari për siguri kombëtare i SHBA-së, Jake Sullivan, tha se sulmet do të shërbejnë vetëm për të thelluar shqetësimet midis G20-ës për "ndikimin destabilizues të luftës së [presidentit rus Vladimir] Putin".
Kjo është hera e parë që G20-ta takohet prej se Rusia ka nisur pushtimin në fund të shkurtit.
Javën e kaluar Moska ka tërhequr trupat e saj nga qyteti jugor Herson - një nga sukseset më të mëdha të Ukrainës në luftën e saj kundër pushtimit rus.
Në të kaluarën, kur Rusia ka pësuar humbje në terren, ajo ka sulmuar përmes ajrit.
