Forca e Sigurisë së Kosovës tha se ka shpëtuar nga rrënojat e tërmetit në Turqi një fëmijë të moshës 2-vjeçare.
Kështu thuhet në njoftimin për media të FSK-së, ku tregohet se ekipet e kërkim-shpëtimit të Forcës së Sigurisë së Kosovës që nga mëngjesi i 8 shkurtit janë duke operuar me kapacitete të plota në Hatay të Turqisë.
Përveç shpëtimit të fëmijës, pak orë më vone, FSK-ja njoftoi se kanë nxjerrë të gjallë nga rrënojat edhe nënën e fëmijës.
FSK-ja tha se gjatë operacionit që janë duke realizuar, ekipet e saj në Turqi kanë hasur në viktima në objektet e kollapsuara, por se prioritet i tyre mbeten vendet ku janë detektuar persona të gjallë, “dhe të gjitha ekipet e shpëtimit nga mbarë bota kanë dhënë prioritet për të shpëtuar sa më shumë jetë”.
Në Turqi dhe Siri, si pasojë e tërmeteve të fuqishme të 6 shkurtit, kanë humbur jetën mbi 11.700 persona.
Mbrëmjen e po kësaj dite, një kontingjent i FSK-së ishte nisur drejt Turqisë për t'i dalë në ndihmë këtij shteti.
Presidentja Vjosa Osmani, e shpalli të mërkurën ditë zie në Kosovë, në nderim të viktimave nga tërmeti në Turqi dhe Siri.
- Mbi 11.700 viktima nga tërmetet në Turqi dhe Siri
- Pse janë të rëndësishme 72 orët e para pas tërmeteve?
Ekipe me specialistë nga vende anembanë botës janë mobilizuar për të ofruar ndihmë në operacionet e kërkim-shpëtimit në Turqi e Siri.
