Besimtarët myslimanë në të gjithë botën, sot festojnë Fitër Bajramin. Pas 30 ditë të agjërimit, ceremonia e festimit të kësaj feste myslimane fillon me faljen e namazit të mëngjesit.
Në Kosovë, si zakonisht manifestimi qendror është mbajtur në Xhaminë e Madhe në Prishtinë. Myftiu i Kosovës, Naim Tërnava, duke dhënë mesazhin e tij, ka thënë se festat si kjo e Fitër Bajramit janë momente për të prezantuar vlerat të vërteta të fesë tonë para botës.
“Festat në islam janë momente reflektimi, momente rikthimi në vlerat e vërteta fetare dhe humane. Ndërlidhja e Fitër Bajramit me lëmoshën për nevojtarët është bërë për të na kujtuar se nuk ka vlerë një manifestim shoqëror në të cilin anëtarët e shoqërisë nuk ndihen të barabartë”, ka thënë kryetari i Bashkësisë Islame të Kosovës, Naim Tërnava.
Besimtarët, që kishin mbushur Xhaminë e Madhe në Prishtinë, kanë thënë se festa e Fitër Bajramit, është triumf i sakrificës që myslimanët e bëjnë për një muaj gjatë Ramazanit.
Safet Thaçi ka thënë se një mysliman i vërtetë, duhet të jetë i njëjtë edhe pas agjërimit.
“Fitër Bajrami është festa në fund të muajit Ramazan, i cili jep një shenjë, një mesazh për të gjithë besimtarët se tani ti mund të jesh një prej atyre të cilët ke pas besimin e plotë gjatë këtij muaji, por nuk do të thotë që tani këtu përfundon, por festa është një gëzim i madh”, ka thënë Safet Thaçi.
Në oborrin e xhamisë, kishte edhe besimtarë nga Shqipëria. Nderim Tota nga Tirana, ka thënë se sfidat që myslimani i ka gjatë Ramazanit, shpërblehen në ditën e Fitër Bajramit.
“Ramazani është një sfidë për njeriun dhe sfida kryesore është që të mposhte egon e tij, të mposhtë veset e tij të këqija dhe t’i afrohet Zotit dhe të bëhet njeri më i mirë, dhe festa është kulmi i kësaj, dhe legjitime është festa për këdo që triumfoi mbi egon e tij dhe u bë njeri më i mirë për në jetën pas Ramazanit”, ka thënë Tota.
Fitër Bajrami pason muajin e shenjtë të Ramazanit, gjatë të cilit, sipas besimit Islam, agjërohet 30 ditë, në shenjë sakrifice dhe përkushtimi ndaj Zotit.
