Në Kosovë ka filluar shënimi i Epopesë së Ushtrisë Çlirimtare të Kosovës. Manifestimi gjithëpopullor “Epopeja e UÇK-së” po zhvillohet nën patronatin e kryeministrit të Kosovës.
Manifestimi bëhet në kujtim të Ushtrisë Çlirimtare të Kosovës dhe Adem Jasharit, që njihet si komandant legjendar i UÇK-së, dhe familjes së tij.
Kuvendi i Kosovës me rastin e shënimit të 20 vjetorit të Epopesë së Ushtrisë Çlirimtare të Kosovës ka mbajtur një seancë solemne.
Kryeministri i Kosovës Ramush Haradinaj gjatë fjalimit të tij në seancën solemne të Kuvendit ka ftuar të gjithë liderët politik, por edhe gjithë shqiptarët e komuniteteve për t’i mbrojtur idealet e lirisë dhe për të ndërtuar Kosovën e së ardhmes.
“20 vjet pas çlirimit heroik të familjes së Adem Jashari për lirinë e vendit duhet të reflektojmë për të djeshmen, të sotmen dhe rrugën tonë drejt të ardhmes. Miqtë e Kosovës na porosisin që të ndërtojmë paqen për të gjithë. sepse ajo është më e vështirë se lufta, pra ta ndërtojmë një Kosovë të denjë për të gjithë qytetarët, të tillë çfarë e ëndërruan dëshmorët dhe heronjtë e Kosovës, pa dhunë e shtypje pa padrejtësi e nëpërkëmbje”.
“Ne kemi ecur 20 vjet në liri dhe të arriturat janë të dukshme, por liria ka dimensione të tjera, lira për të pasur një kulm mbi kokë, një punë për secilin që dëshiron të punojë një pasaportë që të tjerët nuk e shohin me dyshim”, theksoi Haradinaj.
Kryetari i Kuvendi të Kosovës Kadri Veseli tha se janë shënuar të arritura të mëdha gjatë këtyre viteve.
“Në këto 20 vjet, Kosova ka shënuar të arritura të mëdha.Edhe skeptikët më të mëdhenj nuk mund t’i anashkalojnë ato. Në përvjetorin e 10-të të rënies së Adem Jasharit, Kosova shpalli pavarësinë e saj Sot, ne jemi një shtet demokratik, me standarde të larta të lirive dhe të drejtave të qytetarëve, faktor i paqes dhe stabilitetit në rajon. Për herë të parë, si komb i rreshtuar drejt dhe partner i qëndrueshëm i aleancës veri-atlantike si dhe të përkushtuar në rrugën e integrimeve evropiane”, theksoi Veseli.
FSK së shpejti ushtri e Kosovës
Në shënimin e 20 vjetorit të Epopesë së Ushtrisë Çlirimtare të Kosovës, është mbajtur edhe ceremoninë e Forcës së Sigurisë së Kosovës.
Presidenti i Kosovës Hashim Thaçi tha se hapi final i bërjes së Kosovës me Forca të Armatosura është në interes të të gjithë qytetarëve të Kosovës, të gjitha komuniteteve, të sigurisë dhe paqes në Kosovë dhe në rajon.
“Duke marrë parasysh përgatitjen tuaj, bashkëpunimin e suksesshëm dhe përkrahjen që keni nga KFOR-i dhe NATO-ja, ju faktikisht po dëshmoni pjekurinë dhe aftësinë për të ushtruar misionin tuaj themelor, atë të Forcave të Armatosura të Kosovës”, theksoi Thaçi.
Njëzet vjet më parë, në Prekaz të Skënderajt, gjatë sulmeve të forcave serbe të sigurisë në këtë fshat, janë vrarë më shumë se pesëdhjetë anëtarë të familjes Jashari.
Më 24 mars të vitit 1999, me urdhër të ish-sekretarit të përgjithshëm të NATO-s, Havier Solana filluan sulmet ajrore të forcave të NATO-s kundër caqeve serbe në Kosovë dhe në Serbi.
Pas 78 ditësh bombardime të NATO-s, Sllobodan Millosheviqi, në atë kohë president i Serbisë, u dorëzua në qershorin e vitit 1999 dhe pranoi Marrëveshjen e Kumanovës.
Më 10 qershor, Këshilli i Sigurimit miratoi Rezolutën 12 44, me të cilën vendosi administratën e përkohshme të OKB-së në Kosovë dhe fuqizoi praninë ushtarake të KFOR-it.
Kosova, në partneritet me bashkësinë ndërkombëtare, ndërtoi institucionet e saj, të cilat më 17 shkurt të vitit 2008, shpallën pavarësinë e Kosovës.
