Një gjykatë në Francë e ka dënuar Dominique Pelicotin me 20 vjet burgim për drogimin dhe përdhunimin e vazhdueshëm të atëherë bashkëshortes së vet Gisele Pelicot për gati një dekadë, si dhe për rekrutimin e burrave të tjerë për ta përdhunuar atë në shtëpitë e tyre.
Që të gjithë 50 të pandehurit e tjerë në këtë rast u shpallën gjithashtu fajtorë për përdhunim, tentativë përdhunimi apo sulm seksual, teksa viktima e tyre, Gisele Pelicot ishte e pranishme në sallën e gjyqit për ta dëgjuar vendimin, pasi hoqi dorë nga e drejta për anonimitet.
Dominique Pelicot tha në gjykatë se është përdhunues dhe i kërkoi falje familjes së vet. Prokurorët kishin kërkuar dënim maksimal prej 20 vjetëve burgim për të.
Rasti i Gisele Pelicotit, e cila kishte qenë e martuar më Dominiquen për 50 vjet, e ka tronditur botën dhe e ka shndërruar atë në simbol të guximit.
Dominique Pelicot, 72 vjeç, u deklarua fajtor për akuzat gjatë gjyqit tremujor.
Shumica e të pandehurve në këtë rast, të cilët ai i kishte takuar online, e kanë mohuar akuzën e përdhunimit, duke thënë se mendonin se po merrnin pjesë në një lojë seksuale me pajtueshmëri, të orkestruar nga çifti, dhe duke argumentuar se nuk ishte përdhunim nëse burri i saj u dha leje ta bënin.
Pelicot ka thënë se ata e dinin se ish-bashkëshortja e tij ishte e pandjenja dhe e pavetëdijshme kur ndodhen këto akte.
Gjykata i shpalli fajtorë 46 nga të pandehur për përdhunim, dy për tentativë përdhunimi dhe dy për sulm seksual, duke u shqiptuar atyre dënime nga tri deri në 15 vjet burgim, më pak se katër deri në 18 vjet që kërkonte prokuroria.
Të gjithë të pandehurit kanë 10 ditë kohë për të vendosur nëse do të apelojnë, dhe avokati i Dominique Pelicot tha se klienti i tij po e shqyrton këtë mundësi.
Gisele Pelicot, 72-vjeçare, hoqi dorë nga anonimiteti gjatë gjykimit dhe kërkoi që videot e tmerrshme të abuzimit të saj, të cilat ishin xhiruar nga ish-bashkëshorti i saj, të shfaqeshin në gjykatë, duke thënë se kjo do t’u ndihmonte grave të tjera ta ngrenë zërin.
Gjykimi ka nxitur protesta nëpër Francë në mbështetje të Giseles.
“Kam vendosur të mos ndihem e turpëruar. Unë nuk kam bërë asnjë gabim. Ata duhet të ndihen në turp”, tha ajo në gjykatë.
