Bullgaria nuk ka importuar, eksportuar apo prodhuar pejxherë të llojit që shpërthyen të martën në Liban dhe Siri, tha Agjencia Kombëtare e Sigurisë së Bullgarisë (DANS). Të njëjtin konstatim e ka bërë edhe kryeministri në detyrë bullgar.
Për më tepër, kompania bullgare “Norta Global Ltd”, që paraprakisht ishte raportuar se kishte marrë pjesë në zinxhirin e shitjes së pejxherëve, nuk ka kryer asnjë transaksion të shitjes, nën juridiksionin e Bullgarisë.
Në njoftimin e DANS-it u tha se deri në këtë përfundim agjencia erdhi pas një hetimi të përbashkët që kreu me Agjencinë Kombëtare të të Ardhurave, Ministrinë e Brendshme dhe Doganat.
Lajmi për gjetjet e hetimit të DANS-it vjen vetëm një ditë pasi kjo agjenci njoftoi se po niste një hetim të tillë.
Po ashtu, njoftimi vjen pasi mijëra pejxherë të përdorur nga Hezbollahu – grupi libanez i shpallur organizatë terroriste nga Shtetet e Bashkuara – duke vrarë 12 persona. Më pas, media hungareze Telex raportoi se kompania bullgare, “Norta Global Ltd”, i bleu pejxherët nga Tajvani dhe më pas ia shiti Hezbollahut.
Teksa SHBA-ja e konsideron organizatë terroriste Hezbollahun, Bashkimi Evropian e konsideron vetëm krahun e Hezbollahut si terrorist, por jo edhe degën e tij politike.
Tani DANS-i raporton se inspektimi i tij ka vërtetuar “në mënyrë të padiskutueshme se asnjë pajisje komunikimi që korrespondon me ato që shpërthyen më 17 shtator në Liban në Siri nuk ishin importuar, eksportuar apo prodhuar në Bullgari”.
Po ashtu, kompania “Norta Global Ltd”, e regjistruar në Bullgari, por edhe pronarët e saj, nuk kanë kryer transaksione, nën juridiksionin e Bullgarisë, sa i përket blerjes apo shitjes së mallrave.
Sipas të dhënave nga inspektimi i DANS-it, “Norta Global Ltd”, po ashtu nuk kishte kryer operacione financiare që janë në kuadër të Ligjit të masave kundër terrorizmit financiar. DANS-i po ashtu tha se kjo kompani nuk a raporte tregtare me individët dhe entitetet ligjore që jnë të sanksionuara nga Këshilli i Sigurimit i Kombeve të Bashkuara dhe Këshilli i Bashkimit Evropian.
Më vonë gjatë të premtes, kryeministri në detyrë i Bullgarisë, Dimitar Glachev tha se Bullgaria nuk ka "asnjë lidhje me prodhimin apo dërgimin e pejxherëve që eksploduan në Liban dhe Siri”.
Duke u përgjigjur për gazetarët, pas njoftimit të lëshuar nga DANS-i, Dimitar Glachev, tha se “kompania mund të quhet një lloj ‘poste’ për rrjedhjen e parave”.
“Në sipërfaqe, gjithçka duket normale”, tha Glachev.
“E vetmja gjë që ka ndodhur ishin rrjedhjet e parave, që kalonin përmes faturave. Faturat thonë se këto rrjedhje parash ishin për shërbime”, shtoi ai.
Më herët, gazetarët hungarezë thanë se kompania bullgare, “Norta Global Ltd”, ishte pjesëmarrëse në zinxhirin e furnizimit të Hezbollahut me pejxherë. Radio Evropa e Lirë raportoi më 19 gusht se një kompani e tillë ekziston, por nuk ka punonjës dhe ka adresën e saj në Sofje.
