Presidenti i Shteteve të Bashkuara, Joe Biden, dhe udhëheqësi i Kinës, Xi Jinping, u takuan të hënën në Bali të Indonezisë, në prag të samitit të vendeve më të industrializuara, G20.
Në takimin i cili zgjati rreth tri orë, ata u përplasën për çështjen e Tajvanit, por thanë se po përpiqen t'i "menaxhojnë dallimet", raporton AP.
Biden ka premtuar se nuk do të ketë "Luftë të re të Ftohtë" me Kinën, dhe tha se nuk beson se Kina do të pushtonte Tajvanin.
Kina e sheh Tajvanin si provincë të shkëputur, të cilën mund ta marrë edhe me forcë nëse është e nevojshme.
Takimi vjen në kohën kur marrëdhëniet mes dy vendeve janë në nivelin më të ulët në disa dekada, për shkak të disa çështjeve - nisur nga siguria në Tajvan deri te tregtia.
Ky njëherësh është takimi i parë i tyre prej se Biden ka marrë detyrën e presidentit më 2021.
“Kemi kaluar shumë kohë së bashku kur të dy ishim nënkryetarë. Është, thjesht, e mrekullueshme që ju shoh”, i tha Biden Xisë.
“Si udhëheqës të vendeve tona, ne ndajmë përgjegjësinë - mendoj unë - për të treguar se Kina dhe Shtetet e Bashkuara mund t’i menaxhojnë dallimet, mund të parandalojnë që konkurrenca të kthehet në konflikt dhe mund të gjejnë mënyra për të punuar së bashku në urgjencat globale, që kërkojnë bashkëpunimin tonë të ndërsjellë”, tha Biden.
Ai përmendi ndryshimet klimatike dhe pasigurinë ushqimore si probleme që bota pret të trajtohen nga vendet e tyre.
Duke iu përgjigjur Bidenit, Xi tha se si udhëheqës të dy vendeve të mëdha, ata duhet të gjejnë drejtimin e duhur dhe t’i forcojnë marrëdhëniet e tyre.
Temat kryesore të bisedimeve të tyre ishin: Tajvani, Ukraina dhe ambiciet bërthamore të Koresë së Veriut.
Këto tema pritet të përshkojnë edhe samitin e G20-ës, që nis punimet të martën.
Samiti do të mbahet pa praninë e presidentit rus, Vladimir Putin. Atë do ta përfaqësojë ministri i tij i Jashtëm, Sergei Lavrov.
Ky është samiti i parë i G20-ës prej se Rusia ka nisur pushtimin e Ukrainës në shkallë të gjerë, në fund të shkurtit.
