PDK: Kemi fituar shumicën e komunave
Zyrtarët e Partisë Demokratike të Kosovës kanë thënë se në shumicën e komunave të Kosovës kanë fituar.
Abelard Tahiri nga shtabi zgjedhor i PDK-së tha se PDK në tetë komuna ka fituar bindshëm.
"Unë mund t'ju konfirmoj se PDK-ja është në epërsi të thellë nga 10 komuna që kemi qenë në balotazh, në 8 prej tyre është në epërsi dhe në dy prej tyre është në garë mjaft e ngushtë. Po ashtu, mund t'ju konfirmoj që në tri komuna të mëdha: në Mitrovicë, Prizren dhe Ferizaj, PDK-ja ka dalë fituese", tha Tahiri.
Ahmeti: Ta presim KQZ-në për rezultate
Kandidati i Lëvizjes Vetëvendosje për kryetar të Prishtinës, Shpend Ahmeti, ka thirrur një konferencë për gazetarë ku ka thënë se do t’i pres rezultatet zyrtare të Komisionit Qendror të Zgjedhjeve dhe se pavarësisht bindjes së tij, ai nuk do të shpallë fitore.
Kryetari aktual i Prishtinës, Shpend Ahmeti, nga Lëvizja Vetëvendosje dhe Arban Abrashi nga Lidhja Demokratike e Kosovës, iu nënshtruan balotazhit, pasi që në rrethin e parë nuk siguruan shumicën e nevojshme.
"Në do t'i presim rezultatet zyrtare ose së paku ato që na vinë nga vendvotimet ku kemi pasur vëzhguesit tonë ", tha Ahmeti.
LDK: Rikonfirmohemi si partia më e madhe në vend
Rezultati i raundit të dytë të zgjedhjeve lokale në Kosovë, e ka rikonfirmuar Lidhjen Demokratike të Kosovës, si partinë më të madhe në vend. Kështu tha në një konferencë për media, anëtari i kësaj partie, Lumir Abdixhiku.
Abdixhiku tha se LDK në disa komuna ka shënuar fitore bindëse.
“Raundi i dytë i votimeve e rikonfirmon Lidhjen Demokratike të Kosovës si partinë më të madhe në vend. Katër komunave të fituara në raundin e parë i shtohen edhe plotë të tjera. Në radhë të parë dëshirojmë të urojmë kryetarët e rinj të Gjilanit, Podujevës, Istogut dhe Vushtrrisë nga radhët e LDK-së, të cilët me fitore bindëse kanë përfunduar rezultatin zgjedhor”, tha Abdixhiku.
Duke folur për rezultatin që ka shënuar LDK në Prishtinë, Abdixhiku tha se dalja e madhe e votuesve në kryeqytet jep rezultat inkurajues për partinë e tij.
“Sa i përket Prishtinës, rezultatet janë në numërim e sipër. Të dhënat tona nga terreni thonë se kemi një pjesëmarrje të jashtëzakonshme të qytetarëve nga 85 mijë votues në këtë raund, jep rezultat inkurajues për LDK-në në raundin e dytë sa i përket Prishtinës”, tha Abdixhiku.
Partitë nuk i presin rezultatet e KQZ-së, nisin festimet
Ndonëse Komisioni Qendror i Zgjedhjeve nuk i ka shpallur rezultatet preliminare të votimeve për kryetarët e komunave, në disa prej komunave tashmë disa shtabe zgjedhore të partive politike ka nisur festat.
Në Gjakovë, po feston shtabi i Aleancës për Ardhmërinë e Kosovës, duke besuar se kandidati i AAK-së, Ardian Gjini ka fituar kundrejt kandidates nga Alternativa, Mimoza Kusari-Lila.
Kurse në Mitrovicë, festës po i prinë Agim Bahtiri, kandidat i Aleancës për Ardhmërinë e Kosovës për kryetar të komunës së Mitrovicës jugore, i cili, nuk i ka pritur rezultatet e KQZ-së dhe ka shpallur fitoren në garë me Valdete Idrizin nga Partia Demokratike e Kosovës.
Ndërkohë, në Istog po feston Lidhja Demokratike e Kosovës, e bindur se kandidati i saj, Haki Rugova, ka fituar ndaj kandidatit të Aleancës për Ardhmërinë e Kosovës, Gani Dreshaj.
Facebook Forum