Qeveria e Kosovës e ka miratuar të mërkurën një Program Kombëtar për Mbrojtje Gjithëpërfshirës, i cili synon mbrojtjen e vendit nga kërcënimet, sulmet dhe fatkeqësitë natyrore.
Kryeministri i Kosovës, Albin Kurti, tha se programi ua mundëson institucioneve qendrore dhe lokale, veçanërisht qytetarëve, si dhe organizatave të ndryshime joqeveritare të kenë rolin e tyre në mbrojtjen e jetës, sigurisë dhe pasurisë.
“Ministria e Mbrojtjes ka hartuar Programin Kombëtar për Mbrojtjen Gjithëpërfshirëse të Kosovës. Mbrojtja e sovranitetit dhe integritetit nga kërcënimet e jashtme dhe të brendshme konvencionale dhe jokonvencionale dhe ruajtja e jetës dhe pasurisë së qytetarëve në raste të fatkeqësisë natyrore janë interesa jetike të Republikës së Kosovës”, tha Kurti.
Kurti tha se programi është hartuar bazuar në sistemet e ngjashme të vendeve anëtare të NATO-s, aleancës ushtarake që Kosova synon t’i bashkohet.
Programi, sipas tij, synon të ndërtojë “qëndrueshmëri kombëtare” në Kosovë, në mënyrë që shoqëria kosovare të përgatitet “të rezistojë, të reagojë e të rimëkëmbët në raste të fatkeqësive natyrore, apo sulmeve të armatosura”.
“Sistemi ka në thelb mbështetjen që qytetarët ia japin në baza vullnetare ushtrisë sonë, FSK-së, por edhe të kombinuar me strukturat tjera shtetërore”, shtoi ai.
Ndërkohë, ministri i Mbrojtjes i Kosovës, Ejup Maqedonci, tha se ministria e tij e ka hartuar programin mbi bazën e objektivave dhe planifikimeve strategjike.
Ai tha se programi bazohet në shtatë shtylla: funksionimin shtetëror në rast krizash, organizimin shtetëror për mbrojtjen e vendit, mirëmbajtjen e funksioneve vitale, shërbimeve thelbësore të shtetit, qëndrueshmërinë shoqërore, qëndrueshmërinë e furnizimeve shtetërore, mbrojtjen e hapësirës së informacionit dhe edukimin e të rejave dhe të rinjve.
Programi, tha ai, nuk ndërhyn në zhvillimin e Forcës së Sigurisë së Kosovës (FSK) bazuar në planin gjithëpërfshirës të tranzicionit, por ua mundëson qytetarëve të luajnë rol vullnetar në mbrojtjen dhe sigurinë e vendit.
Procesi i transformimit të FSK-së në Forcë të Armatosur të Kosovës ka nisur në dhjetor të vitit 2018, kur Kuvendi i Kosovës miratoi ndryshimet ligjore, për të ndryshuar mandatin e FSK-së. Ky proces është planifikuar të zgjasë dhjetë vjet - deri në vitin 2028.
Forca e Sigurisë e Kosovës aktualisht ka rreth 2.500 pjesëtarë. Pas periudhës së tranzicionit, ky numër pritet të rritet në më shumë se 7.500 dhe do të përfshijë anëtarë aktivë dhe rezervë.
