Kryeministri i Kosovës, Albin Kurti, tha të hënën se sulmin, siç u shpreh ai, “paramilitar dhe terrorist”, ndaj Policisë së Kosovës në veri të vendit e kreu “Klani i Novi Sadit i udhëhequr nga ministri i Mbrojtjes i Serbisë, Millosh Vuçeviq”.
Një rreshter i Policisë së Kosovës u vra më 24 shtator në fshatin Banjskë të Komunës së Zveçanit, pasi policia u sulmua nga një grup serbësh të armatosur.
“Para dy dekadave në Serbi sundonte Klani i Zemunit, kurse tash vendin atij ia ka zënë Klani i Novi Sadit. Kriminelë në luftë, kriminelë në paqe; kriminelë në Serbi, kriminelë në Kosovë. Presidenti i shtetit, Aleksandar Vuçiq, porsi një capo-di-tutti-capi, ndodhet aty për të dëshmuar që ndonëse krimi e dikton shtetin, në fakt, është shteti që e dikton krimin”, shkroi Kurti në Facebook të hënën.
Ministria e Mbrojtjes e Serbisë i ka hedhur poshtë si “gënjeshtra plotësisht të neveritshme dhe flagrante” deklaratat e kryeministrit të Kosovës, Albin Kurti.
Ekzistimi i një "Klani të Novi Sadit" nuk është i njohur për publikun në Serbi.
Në përleshjet që pasuan në manastirin e Banjskës, ku u fshehën sulmuesit, u vranë tre nga ta.
Drejtori i Përgjithshëm i Policisë së Kosovës, Gazmend Hoxha, tha më 1 tetor se gjatë operacionit “tonë brenda manastirit u gjetën 49 persona civilë, 43 pelegrinë dhe gjashtë personel, asnjëri nga këta nuk është dëmtuar apo keqtrajtuar.”
Duke folur për këtë të hënën, Kurti tha se “rreth 40 pelegrinë ortodoksë në Manastir të Banjskës me 24 shtator ishin nga Novi Sadi. Ndoshta e rastësishme, hetimet duhet ta tregojnë.”
Kosova dhe Serbia kanë nisur hetime paralele për ngjarjet në Banjskë, ndërkohë që Bashkimi Evropian i ka bërë thirrje Beogradit të bashkëpunojë plotësisht për këtë çështje.
Kosova e ka akuzuar Serbinë se tentoi ta “aneksojë tërë veriun e Kosovës”, gjë të cilën Serbia e ka mohuar, megjithëse përgjegjësinë për sulmin e mori Millan Radoiçiq, nënkryetari i atëhershëm i Listës Serbe, partisë më të madhe të serbëve në Kosovë që ka mbështetjen e Beogradit.
Policia e Kosovës i arrestoi disa nga sulmuesit, por shumica dërrmuese e tyre ikën nga vendi i ngjarjes.
Kurti theksoi se “grupi terrorist në arrati i udhëhequr nga Millan Radoiçiq po qëndron në Rashkë. Atyre MUP-i famëkeq serb iu ka ndarë vetura të tipit Shkoda Oktavia me ngjyrë të bardhë dhe të zezë e me tabela regjistrimi BG dhe… NS.”
Ai paralajmëroi se në katër komunat veriore të Kosovës po merr fund “terrori, kriminaliteti dhe kultura e dhunës e paramilitarëve të Delije (tifozët e Cërvena Zvezdës) që shprehet me nofkat e ekstremistëve si: Mami, Llune, Daco, Rusi, Nemac, Gile, Drago, Aco, Comi, Belli, Micko, Prki, Mrki etj."
Nofkat që ai i përmendi janë të personave që dyshohet se janë të lidhur me “veprimtari kriminale” në veri të Kosovës dhe se janë tifozë të Cërvena Zvezdës.
Disa nga nofkat si, “Mami”, “Llune” dhe “Nemac”, janë të Millun Millenkoviq, Nenad Orlloviq dhe Vlladimir Radivojeviq, përkatësisht.
Millun Millenkoviq – Llune ndodhet në paraburgim që nga 13 qershori dhe është zgjedhur si lider i Mbrojtjes Civile, të cilën Kosova e ka shpallur organizatë terroriste.
Orlloviq u arrestua më 23 qershor për një sulm ndaj anëtarëve të misionit të NATO-s në Kosovë (KFOR) në komunën e Zveçanit në fund të majit, kur serbët vendas kundërshtuan ardhjen e kryetarëve shqiptarë në pushtet.
Millenkoviq dhe Orlloviq akuzohen për tri vepra kriminale: terrorizëm, ndryshim të dhunshëm të rendit kushtetues të Kosovës dhe rrezikim të një personi nën mbrojtje ndërkombëtare.
Ndërkohë, më 29 shtator, Policia e Kosovës e bastisi shtëpinë e Vlladimir Radivojeviqit në Zveçan, i cili njihet me nofkën “Mami”.
Gjithashtu, bëhet e ditur se ai është një nga drejtuesit e tifozëve të klubit të futbollit Cërvena Zvezda. Atë ditë, autoritetet e Kosovës konfiskuan pronën e Millan Radoiçiqit në veri të Kosovës, si pjesë e një operacioni-kërkimi në lidhje me sulmin ndaj policisë së Kosovës në Banjskë.
Vendet perëndimore e dënuan ashpër sulmin në Banjskë ndaj Policisë së Kosovës dhe kërkuan hetim. Ndërkohë, i dërguari special i BE-së për dialogun ndërmjet Kosovës dhe Serbisë, Miroslav Lajçak, tha se ngjarjet në Banjskë e kanë ndryshuar situatën, por se dialogu për normalizimin e marrëdhënieve “nuk ka alternativë”.
Lajçak, pas takimit të pesëshes së madhe me kryeministrin e Kosovës, Albin Kurti, tha se ngjarjet e 24 shtatorit “treguan qartë se shtensionimi dhe normalizimi [i marrëdhënieve ndërmjet Kosovës dhe Serbisë] tani janë më urgjente se kurrë më parë”.
