Sipas Shtabit të Përgjithshëm të Ushtrisë së Ukrainës, forcat ukrainase kanë bërë përparim të vazhdueshëm në rajonin jugor, duke çliruar me sukses një zonë afërsisht të barabartë me madhësinë e qytetit të Odesas që nga fillimi i kundërofensivës së tyre. Ky përditësim u dha më 10 korrik.
Megjithatë, mes këtyre përparimeve, një sulm i fundit rus në një qytet në Zaporizhja la të vdekur të paktën katër persona dhe plagosi 13 të tjerë.
Përshkallëzimi në luftime përkon me samitin e NATO-s, që mbahet më 11 dhe 12 korrik në Vilnius, të Lituanisë. Konflikti i vazhdueshëm në Ukrainë dhe marrëdhënia e aleancës me Kievin pritet të jenë tema kryesore të diskutimit gjatë samitit.
Gjatë javës së shkuar, ushtria ukrainase ka përparuar 1 kilometër në zonat Melitopol dhe Berdiansk të rajonit të Zaporizhja, sipas raportit të Shtabit të Përgjithshëm në Facebook.
Që nga fillimi i kundërofensivës në jug, forcat ukrainase kanë arritur një përparim total prej 8.6 kilometrash dhe kanë çliruar mbi 10 kilometra katrorë. Territori i rifituar në zonat Melitopol dhe Berdiansk arrin në 169 kilometra katrorë, afërsisht sa madhësia e qytetit të Odesës.
Zëvendësministrja e Mbrojtjes Hanna Malyar deklaroi se forcat ukrainase po konsolidojnë arritjet e tyre në zonat jugore të Melitopol dhe Berdiansk, ku po zhvillohen beteja intensive.
Në rajonin lindor të Donjeckut, forcat ruse janë në mbrojtje në Bahmutit, derisa luftimet e ashpra vazhdojnë në Liman, Avdivka dhe Marinka. Shtabi i Përgjithshëm raportoi mbi 30 përleshje luftarake në ato zona brenda 24 orëve të fundit.
Të paktën pesë persona u vranë dhe 13 të tjerë u plagosën kur bombardimet ruse shënjestruan një qendër shpërndarjeje ndihme në Orihiv, një qytet i vendosur në vijën e frontit në rajonin jugor të Zaporizhja, bëri të ditur guvernatori i rajonit, Yuriy Malashko, më 10 korrik.
Numri i të vdekurve u rrit kur trupi i një burri tjetër u tërhoq nga një qendër shpërndarëse e ndihmave e cila ishte shkatërruar. Ministria e Brendshme njoftoi se tre persona mund të jenë ende nën rrënoja.
Ekipet e shpëtimit vazhduan operacionet e kërkimit deri në orët e vona të 10 korrikut.
Malashko gjithashtu raportoi se forcat ruse kryen 36 sulme ajrore në dhjetë vendbanime civile në rajonin e Zaporizhjas brenda 24 orëve të fundit.
Për më tepër, më 10 korrik, trupat ruse përdorën raketa balistike në një sulm në qytetin jugor të Mikolaivit, duke shkaktuar dëme në infrastrukturën civile, bëri të ditur guvernatori rajonal Vitaly Kim në Telegram.
Përpara samitit të Vilnius, vendet anëtare të NATO-s mbeten të ndara në qëndrimet e tyre në lidhje me rrugën e anëtarësimit të Ukrainës në Aleancën ushtarake.
Megjithatë, ata duket se e kanë kapërcyer një pengesë të rëndësishme për pranimin e Kievit, duke hequr kërkesën për një Plan Veprimi për Anëtarësim (MAP), i cili listonte objektiva politike, ekonomike dhe ushtarake për vendet e tjera të Evropës Lindore përpara se të bashkoheshin me aleancën.
Largimin e kësaj pakete e propozoi Sekretari i Përgjithshëm i NATO-s, Jens Stoltenberg.
Ministri i Jashtëm ukrainas Dmytro Kuleba shkroi në Twitter se kishte pasur një konsensus midis aleatëve për të hequr dorë nga MAP, por shtoi se ndërsa ai e mirëpret vendimin e shumëpritur, është gjithashtu "momenti më i mirë për t'i ofruar qartësi ftesës ndaj Ukrainës për t'u anëtarësuar".
Zelensky më 10 korrik u kërkoi përsëri aleatëve perëndimorë një "sinjal të qartë" mbi perspektivat e anëtarësimit të vendit të tij në NATO.
"Ukraina e meriton të jetë në aleancë. Jo tani, sepse tani ka luftë, por ne kemi nevojë për një sinjal të qartë dhe ky sinjal është i nevojshëm tani," tha Zelenskiy në një video-mesazh të postuar në Telegram.
"Realiteti i sigurisë këtu në krahun lindor të NATO-s varet nga Ukraina. Kur aplikuam për t'u bashkuar me NATO, ne ishim të sinqertë: Ukraina është de fakto tashmë në aleancë. Armët tona janë armët e aleancës. Vlerat tona janë ato në të cilat aleanca beson. Mbrojtja jonë është vetë elementi i formulës së Evropës që e bën atë të bashkuar, të lirë dhe paqësore”, tha Zelensky.
Stoltenberg tha në një konferencë për shtyp se do të ketë më shumë takime, duke shtuar se nuk është marrë asnjë vendim përfundimtar, por ai është "absolutisht i sigurt se ne do të kemi unitet dhe një mesazh të fortë për Ukrainën".
Moska paralajmëroi përsëri kundër lejimit të Kievit në aleancë. Zëdhënësi i Kremlinit Dmitry Peskov tha se kjo do të kishte një ndikim "shumë, shumë negativ" në sigurinë e Evropës dhe Moskës do të duhet të mendojë për një përgjigje "të vendosur" ndaj asaj që ai e quajti "një rrezik absolut dhe një kërcënim për vendin tonë".
Presidenti Vladimir Putin ka përmendur zgjerimin e NATO-s drejt lindjes si arsye për vendimin e tij për të dërguar forcat e tij të armatosura në Ukrainë në shkurt 2022.
