Kievi zyrtar raportoi më 2 mars se Rusia ka intensifikuar sulmin e saj ndaj Bahmutit gjatë 24 orëve të fundit, duke ushtruar presion të jashtëzakonshëm mbi mbrojtësit ukrainas në rajonin lindor të Donjeckut.
Për më tepër, zyrtarët rajonalë të Ukrainës deklaruan se granatimet gjatë natës në Zaporizhja kishin vrarë të paktën tre civilë.
Shtabi i Përgjithshëm i Ukrainës raportoi se kishin zmbrapsur mbi 170 aksione ofensive ruse në lindje dhe verilindje, që është më shumë se dyfishi i numrit krahasuar me 24 orët e mëparshme.
Shumica e sulmeve kishin për cak qytetin e Bahmutit, por zona të tjera si Lymani, Avdijvka dhe Shakhtarsku ishin gjithashtu në shënjestër.
Ushtria ukrainase konfirmoi se Rusia vazhdoi të përparonte drejt Bahmutit me synimin për të sulmuar qytetin.
Forcat ruse kanë nisur sulme të shumta të këmbësorisë për të rrethuar dhe shkëputur linjat e furnizimit të Ukrainës. Pavarësisht shkatërrimit të qytetit, dhjetëra mijëra civilë janë ende brenda Bahmutit.
Ushtria raportoi, gjithashtu, zjarr artilerie në bregun perëndimor të lumit Dnieper në Herson, nga i cili forcat ruse ishin tërhequr në nëntor.
Sipas raportit të mëngjesit të Shtabit të Përgjithshëm, për sulme ruse ndaj objektivave civile dhe infrastrukturës u raportua edhe në rajonin verilindor të Harkivit dhe Poltavas në Ukrainën qendrore, duke plagosur njerëz dhe duke dëmtuar infrastrukturën.
