Shtetet e Bashkuara po shprehin padurim në lidhje me mungesën e vullnetit të Iranit për të bërë përparim në bisedimet për ringjalljen e marrëveshjes bërthamore me fuqitë botërore.
Një zyrtar amerikan tha se mbase Irani mund të ketë një “Plan B” që i mundëson të mbajë kursin e njëjtë në programin e tij bërthamor.
Por, ky zyrtar që nuk deshi të identifikohet, tha gjithashtu se Sekretari i Shtetit i SHBA-së, Antony Blinken, nuk e ka caktuar një datë se kur mund të marrë fund durimi i Shteteve të Bashkuara në negociata, të cilat përfshijnë zyrtarë të BE -së dhe nënshkrues të tjerë të Planit të Përbashkët Gjithëpërfshirës të Veprimit (JCPOA) të vitit 2015.
Negociatat të cilat zhvillohen në Vjenë kanë ngecur, pjesërisht për shkak të zgjedhjeve iraniane që e sollën në pushtet presidentin e linjës së ashpër, Ebrahim Raisi.
"Tani për tani nuk ka asnjë sinjal pozitiv se Irani është gati të kthehet në bisedime", u citua zyrtari, duke shtuar se Teherani ende nuk e ka emëruar një negociator të ri për bisedime.
Presidenti amerikan, Joe Biden, i tha Asamblesë së Përgjithshme të OKB-së këtë javë se vendi i tij është i gatshëm t'i kthehet zbatimit të marrëveshjes nëse edhe Irani e bën të njëjtën gjë.
Shtetet e Bashkuara dhe qeveritë e tjera perëndimore dhe agjencitë e inteligjencës kanë akuzuar Teheranin se po përpiqet të krijojë një kapacitet prodhues të bombave bërthamore, një akuzë që zyrtarët iranianë e kanë refuzuar vazhdimisht.
Presidenti amerikan, Donald Trump, i pati tërhequr Shtetet e Bashkuara nga marrëveshja e fuqive botërore me Iranin, pasi kishte thënë se ajo i mundësonte këtij vendi që në plan afatgjatë të posedojë armë bërthamore.
Ai vendosi sanksione shkatërruese ndaj Iranit dhe si kundërpërgjigje Teherani filloi me shkelje të marrëveshjes.
Në bisedimet e Vjenës të dyja palët nuk bisedojnë në mënyrë të drejtëpërdrejtë mirëpo përmes negociatorëve evropianë.
