Dhjetë pacientë të prekur me koronavirus në Kosovë janë duke u trajtuar në Klinikën Infektive të Qendrës Klinikë Universitare të Kosovës, ndërsa gjashtë të tjerë janë duke u trajtuar në shtëpi.
Valbon Krasniqi, infektolog, tha për Radion Evropa e Lirë se gjatë ditës së martë pritet që së paku edhe dy pacientë të lirohen në shtëpi për trajtim të mëtutjeshëm, pasi gjendja e tyre shëndetësore është stabile.
“Gjashtë pacientë të prekur me COVID-19 janë nëpër shtëpitë e tyre në vetizolim. Gjendja shëndetësore e të gjithëve është e mirë. Vetëm një pacient 77-vjeçar aktualisht është nën kontroll më të rreptë dhe ka nevojë për oksigjen, por gjendja e tij është stabile”, tha Krasniqi.
Të martën në Kosovë është konfirmuar edhe një rast me koronavirusin, duke e çuar në 16 numrin e të prekurve.
- Për informacionet e fundit rreth koronavirusit në Kosovë dhe në botë, lexoni blogun e drejtpërdrejtë të Radios Evropa e Lirë.
