Administrata Tatimore e Kosovës ka trajtuar 516 raste nga gjithsejtë 1, 809 thirrjeve të pranuara nga qytetarët për rritje të çmimeve nga biznese .
Në një komunikatë për media, ATK thotë se ka diferencë mes numrit të raportimeve dhe numrit të rasteve të trajtuara, pasi që përmes linjave të hapura telefonike në të shumtën e rasteve, për një biznes të njëjtë është raportuar dhjetëra herë.
“Si rezultat i vizitave në terren, është konstatuar se një numër i konsiderueshëm i bizneseve kanë rritur çmimet e produkteve bazike ushqimore, si dhe atyre farmaceutike, andaj ATK në bashkëpunim me organet kompetente, duke përfshirë këtu inspektoratin e tregut, prokurorin dhe policinë, bazuar në raportet e inspektorëve tatimor do të ndërmarr veprime ligjore”, thuhet në komunikatë.
Sipas ATK-së, denoncimet e këtyre rasteve kanë qenë kryesisht për produkte bazike ushqimore si miell, vaj, sheqer dhe farmaceutike si maska mbrojtëse, dezinfektues, alkool, si dhe sirup për fëmijë Vitaminë C.
