Ministri në largim i Punëve të Jashtme në Qeverinë e Kosovës, Behgjet Pacolli, ka reaguar pas njoftimit të ministrit serb të Mbrojtjes, Aleksandar Vulin për kthimin e statusit të Brigadës 63 Parashutiste dhe 72 të Forcave Speciale në ushtrinë e Serbisë.
Ai ka thënë se të dyja këto brigada kanë kryer krime të tmerrshme në Kosovë dhe Bosnje.
“Brigada 63 Parashutiste është përgjegjëse për vrasjen e më shumë se 25 shqiptarëve në Gjakovë. Kjo është vazhdimësi e politikës mohuese të Serbisë që është përballur vetëm me heshtjen e komunitetit ndërkombëtar. Tribunali për Krime të Luftës në ish-Jugosllavi ka dështuar sa u përket krimeve të luftës të kryera nga Serbia në Kosovë. Njëjtë ka dështuar misioni i UNMIK-ut dhe Eulex-it”, ka thënë Pacolli në disa postime në rrjetin social, Twitter.
Pas 13 vjetësh, Ushtria Serbe u ka rikthyer statusin, brigadës 63 Parashutiste dhe 72 për Operacionet Speciale.
Të dyja këto brigada kanë marrë pjesë në luftërat e viteve të 1990-ta dhe në vitin 2006, kur u formua Ushtria Serbe, këtyre dy brigadave iu ulën gradat në nivel të batalioneve si pjesë e Brigadës Speciale.
Ministri i Mbrojtjes i Serbisë, Aleksandër Vulin, duke njoftuar vendimin për ndryshimet organizative në Brigadën Speciale, tha se brigadat 63 dhe 72- kanë ruajtur emrin e tyre përkundër "atyre që donin t'i zvogëlonin dhe t'i harronin".
Të dyja brigadat, si njësi elitare, morën pjesë nga viti 1991 deri në 1999 në luftërat e ish-Jugosllavisë, përkatësisht në Sarajevë të Bosnjës dhe Gjakovë të Kosovës, ka thënë për Shërbimin e Ballkanit të Radios Evropa e Lirë, Jovana Kolariq, studiuese në Qendrën e të Drejtës Humanitare.
