Ministria e Brendshme e Rusisë tha se një person i armatosur ka hyrë në shtëpinë e kryetares së Komisionit Qendror të Zgjedhjeve, Ella Pamfilova, dhe se e ka goditur atë me armë.
"Personi i maskuar ka depërtuar përmes një dritareje dhe ka hyrë në terracën e shtëpisë. Ai vazhdimisht e ka goditur pronaren [Pamfilova] dhe pastaj ka ikur", thuhet në njoftim.
Aty nuk përmendet motivi i mundshëm, por thuhet se hetimet po vazhdojnë.
Pamfilova u pa më vonë në një konferencë në Moskë dhe tha se "është në rregull" dhe se "do të mbijetojë".
Udhëheqësi i opozitës ruse, Alexei Navalny, shkroi në një postim në Twitter se lajmi "është i rremë".
Rusët në shumë rajone, përfshirë kryeqytetin, Moskën, votojnë në zgjedhjet lokale më 8 shtator.
Me javë të tëra, aktivistët e opozitës kanë protestuar në Moskë, të zemëruar që Komisioni Qendror i Zgjedhjeve ka ndaluar shumë kandidatë të pavarur të garojnë.
Qindra vetë janë arrestuar gjatë protestave, ndërsa disa aktivistë janë dënuar me burg deri në katër vjet.
