Kryeministri në dorëheqje i Kosovës, Ramush Haradinaj do t’i drejtohet Gjykatës Kushtetuese në lidhje me kompetencat dhe përgjegjësitë e Qeverisë në dorëheqje.
Ai kishte thirrur të premten mbledhjen e rregullt të kabinetit qeveritar, por në debatet me ministrat të cilët janë pjesë e partive të koalicionit, u ngrit qartë çështja e kompetencave të kësaj qeverie, e cila ka një javë që drejtohet nga një kryeministër që ka dhënë dorëheqje të parevokueshme.
Në një gjendje të tillë, Haradinaj tha se “është i detyruar të kërkojë mendimin dhe interpretimin e Gjykatës Kushtetuese”, në lidhje me përgjegjësitë dhe funksionet që ka një qeveri në një rast të tillë.
Haradinaj tha se Qeverisë së tij në dorëheqje, i duhet një qartësim rreth kompetencve dhe përgjegjësive, pasi që vendi nuk mund të mbetet pa qeverisje deri në momentin kur të formohet një qeveri e re.
Ramush Haradinaj ka dhënë dorëheqje të premten e kaluar, më 19 korrik, pasi që ishte ftuar nga Prokuroria Speciale e Dhomave të Veçanta në Hagë për t’u intervistuar në cilësinë e të dyshuarit për krime lufte.
