Ministria e Jashtme e Pakistanit ka konfirmuar se nëntë nga 50 personat e vrarë në Kristçërç të Zelandës së Re, gjatë sulmeve në xhami, janë shtetas pakistanez.
Qeveritë nga e mbarë bota po ashtu kanë konfirmuar se në mesin e të vrarëve ka shtetas së tyre. Në mesin e të vrarëve janë edhe shtetas të Afganistanit, Bangladeshit, Turqisë, Arabisë Saudite, Jordanisë, Indonezisë, Malajzisë, Egjiptit dhe Shteteve të Bashkuara të Amerikës.
Një dokument, ku janë listuar viktimat e dy sulmeve më 15 mars, tregon se viktimat ishin nga tre deri në 77 vjet.
Më 15 mars, një sulmues i armatosur hyrë në xhaminë Al Noor në qytetin Kristçërç dhe hapi zjarr, duke goditur dhjetëra persona, përpara se të sulmonte edhe një xhami tjetër.
I dyshuari është një australian, 28-vjeç, i cili besohet se është supermacist i bardhë. Ai është arrestuar dhe është akuzuar për vrasje. I dyshuari, kishte postuar një video të sulmit në internet dhe po ashtu edhe një manifest ku shprehte pikëpamjet e tij anti-myslimane.
Në mesin e pakistanezëve të vrarë është edhe 50-vjeçari Mian Naeem Rashid, i cili është vrarë teksa ka tentuar që ta çarmatos sulmuesin. Po ashtu i vrarë është edhe djali i tij 22-vjeçar, Talha Naeem.
Ndërkaq, ambasada e Afganistanit në Zelandën e Re ka konfirmuar se dy shtetas të tij janë vrarë gjatë sulmeve në xhami, duke shtuar se në mesin e të plagosurve janë edhe tre shtetas afganë.
