Negociatorët amerikanë dhe talibanë ranë dakord për strukturën e një marrëveshjeje të paqes, e cila do t'i jepte fund konfliktit 17-vjeçar në Afganistan, tha kryenegociatori i Shteteve të Bashkuara, Zalmay Khalilzad.
Negociatorët amerikanë zhvilluan gjashtë ditë bisedime me talibanët në Katar, javën e kaluar.
Talibanët, deri më tash, kanë refuzuar të mbajnë bisedime të drejtpërdrejta me zyrtarët afganë, duke i cilësuar ata si "kukulla" të SHBA-së.
Khalilzad, i dërguar i posaçëm i SHBA-së për paqe në Afganistan, qëndroi në Kabul për t'i informuar zyrtarët atje në lidhje me bisedimet.
"E kemi strukturën, e cila duhet të zgjerohet përpara se të bëhet marrëveshje", tha Khalilzad për New York Times-in në Kabul.
Talibanët thonë se do t'i nisin negociatat me Qeverinë afgane pasi të arrihet pajtim për datën e tërheqjes së trupave amerikane nga Afganistani.
Të hënën, presidenti afgan, Ashraf Ghani, u bëri sërish thirrje talibanëve që të bisedojnë direkt me qeverinë e tij.
Në intervistën për New York Times, Khalilzad tha se talibanët janë zotuar se nuk do t'iu ofrojnë streha të sigurta grupeve terroriste - çfarë është kërkesë kyçe e Uashingtonit nëse i tërheq trupat.
